ილიას სახელმწიფო უნივერსიტეტის რექტორი გიგა ზედანია ყველა დაინტერესებულ პირს ილიაუნის საკითხებზე სამსჯელოდ ფორუმზე იწვევს. გიგა ზედანია წერს, რომ შეხვედრა ყველაზე დიდ, ბ201 აუდიტორიაში, ჭავჭავაძის #32-ში, პარასკევს, 19 საათზე გაიმართება.

ზედანია წერს, რომ ამ დღეებში ბევრ ადამიანს გაუჩნდა წუხილი ილიაუნის თაობაზე. ზოგიერთი მათგანი ილიაუნის თანამშრომელია, ზოგი — სტუდენტი, ზოგიც უბრალოდ გულშემატკივარი.

"ცხადია, ეს წუხილი ჩემი წუხილიცაა, ვხედავ ჩემს პასუხისმგებლობასაც და არანაირად არ ვაპირებ მას გავექცე. მეც, ილიაუნის მმართველი ორგანოებიც, ადმინისტრაციაც ყველაფერს გავაკეთებთ სტუდენტებთან კომუნიკაციის გასაგრძელებლად, დასამყარებლად, აღსადგენად. ასევე ვაპირებ განსაკუთრებით ბიზნესის მიმართულების პროფესურასთან კონსულტაციებს, რათა ვისაუბროთ იმაზე, თუ როგორ გვესახება ამ მიმართულების მომავალი", — წერს ზედანია ფეისბუქზე.

მისი თქმით, ილიაუნის საკითხზე ფართო დისკუსია უნდა დაიწყო, თუ როგორი უნდა იყოს ილიაუნი და მისი სამომავლო განვითარების გზა.

"გიწვევთ ყველას, ვისაც ამ საკითხებზე მსჯელობა გინდათ და ვისთვისაც ილიაუნის განვითარება და მომავალი მნიშვნელოვანია, ჩვენს ყველაზე დიდ, ბ 201 აუდიტორიაში, ჭავჭავაძის 32-ში, პარასკევს, 19 საათზე. ეს არ იქნება ჩემი პრეზენტაცია, ეს იქნება ფორუმი ყველა იმ ადამიანისათვის, რომელსაც ამ საკითხებზე აზრის გამოთქმა სურს", — წერს ზედანია.

ილიას სახელმწიფო უნივერსიტეტის ბიზნესის სკოლის სტუდენტებმა რეორგანიზაციის პროცესის შეჩერების მოთხოვნით საპროტესტო აქცია გამართეს. ისინი ლექტორების მხარდაჭერას და გიორგი ქადაგიძის აქციაზე მისვლას ითხოვდნენ.

31 იანვარს გიორგი ქადაგიძემ განაცხადა, რომ უნივერსიტეტისთვის ცვლილებები და ძირეული სიახლეები მიუღებელია და თანამდებობიდან მოხსნეს. უნივერსიტეტის რექტორის, გიგა ზედანიას თქმით, სტრუქტურული რეფორმაში მონაწილეობაზე გიორგი ქადაგიძე უარს ამბობდა. უნივერსიტეტში ახალი ფაკულტეტი მენეჯმენტის, ტექნოლოგიებისა და განათლების ფაკულტეტი შეიქმნა, რომლის ნაწილიც ბიზნესსკოლა გახდა.