ხორავას ქუჩაზე მოკლული მოზარდის მამა ზაზა სარალიძე გენერალურ პროკურორს, შალვა თადუმაძეს ხვდება. ამის შესახებ On.ge-ს პროკურატურაში დაუდასტურეს.

მთავარ პროკურატურაში პოზიცია შეიცვალეს და სარალიძეს შენობაში შესვლის უფლება მისცეს. მანამდე უწყებამ გაავრცელა განცხადება, რომ შეხვედრა სამშაბათს, 12 თებერვალს შედგებოდა, ვინაიდან "ტერიტორიაზე თვითნებურად შეჭრის" შემდეგ ზაზა სარალიძესთან კომუნიკაციას ვერ შეძლებდნენ.

ზაზა სარალიძემ შესვლამდე ჟურნალისტებს უთხრა, რომ მთავარი შეკითხვა პროკურორთან ექნება, თუ ვინ მოკლა მისი შვილი და რას გეგმავს საგამოძიებო უწყება:

"კითხევს დავსვამ, მაგრამ რა პასუხებით გამოვალ ვერ გეტყვით".

ზაზა სარალიძე ადვოკატთან და მხარდამჭერებთან ერთად დღეს, 6 თებერვალს მთავარ პროკურორთან შესახვედრად მივიდა. იგი პროკურატურის ეზოში შევიდა, თუმცა შენობაში სესვლის უფლება უსაფრთხოების სამსახურმა არ მისცა. სარალიძეს პროკურატურის შენობა ძალის გამოყენებით დაატოვებინეს, რის შემდეგაც შესასვლელთან პოლიციის კორდონი გაჩნდა.