კარაკასში, ვენესუელის დროებითი პრეზიდენტის, ხუან გუაიდოს მხარდამჭერ მრავალათასიან აქციაზე საქართველოს დროშა გამოჩნდა. საპროტესტო აქციაზე საქართველოს დროშასთან ერთად ყველა იმ ქვეყნის დროშა აჩვენეს, რომელმაც ხუან გუაიდოს მხარი დაუჭირა და ის დროებით პრეზიდენტად აღიარა.

აქციაზე შეკრებილებმა ხუან გუაიდოს მხარდაჭერა კიდევ ერთხელ გამოუცხადეს და ნიკოლას მადუროს გადადგომა მოითხოვეს. აქციის მონაწილეები ამბობენ, რომ ქვეყანაში ვადამდელი საპრეზიდენტო არჩევნები უნდა დაინიშნოს.

ვენესუელის ეროვნული ასამბლეის თავმჯდომარემ, ხუან გუაიდომ ქვეყნის დროებით პრეზიდენტად თავი 24 იანვარს გამოაცხადა. მისივე თქმით, ის დაასრულებს ქვეყანაში ნიკოლას მადუროს დიქტატორულ რეჟიმს, ჩამოაყალიბებს გარდამავალ მთავრობას და სამართლიან საპრეზიდენტო არჩევნებს ჩაატარებს.

გუაიდოს ლეგიტიმურობა ლათინური ამერიკის ბევრმა ქვეყანამ აღარა. მხარდამჭერებს შორის არიან აშშ, კანადა, ევროკავშირის წევრი ქვეყნები და საქართველო. აშშ-მ ვენესუელის კუთვნილ ნავთობკომპანიას სანქციებიც დაუწესა.

ნიკოლას მადუროს ქვეყანაში ჯარისა და უზენაესი სასამართლოს მხარდაჭერა აქვს. გარდა ამისა, მის ლეგიტიმურობას აღიარებენ რუსეთი, ჩინეთი, თურქეთი, ირანი, კუბა და აფხაზეთისა და სამხრეთ ოსეთის დე ფაქტო რესპუბლიკები.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, ნიკოლას მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა. მადუროს არალეგიტიმურ პრეზიდენტად მიიჩნევს საქართველოს ხელისუფლებაც.

ევროპის რამდენიმე ქვეყანამ ნიკოლას მადუროს ვადამდელი საპრეზიდენტო არჩევნების დასანიშნად რამდენიმედღიანი ვადა მისცა, წინააღმდეგ შემთხვევაში ლეგიტიმურ მმართველად ხუან გუაიდოს აღიარებდნენ. მადურომ ულტიმატუმის შესრულებაზე უარი თქვა.

სამაგიეროდ მას ვადამდელი საპარლამენტო არჩევნების ჩატარება სურს. მომდევნო არჩევნები 2020 წელსაა დაგეგმილი და ეროვნულ ასამბლეაში უმრავლესობას ამჟამად ოპოზიცია იკავებს. ვადამდელი საპარლამენტო არჩევნების ჩატარებას კონსტიტუციური ასამბლეაც ემხრობა. კონსტიტუციური ასამბლეა მადურომ პარლამენტის საპირწონედ და შექმნა და იგივე ფუნქციები დააკისრა. მადუროს "პარლამენტში" უმრავლესობას მისი მხარდამჭერები იკავებენ.

ამავე თემაზე: