საქართველოსთვის ვიზალიბერალიზაციის მინიჭების საკითხს ევროპარლამენტის მართლმსაჯულებისა და სამოქალაქო საკითხების კომიტეტმა(LIBE) 44 ხმით, 5-ის წინააღმდეგ მხარი დაუჭირა.

5 სექტემბერს, ევროპარლამენტის კომიტეტში(LIBE) საქართველოსთვის ვიზალიბერალიზაციის მინიჭების საკითხს კენჭი უყარეს. კენჭისყრა განხილვისა და მოხსენების წაკითხვის გარეშე წარიმართა.

რადიო თავისუფლების ბრიუსელის ბიუროს კორესპონდენტი რიკარდ იოზვიაკი ტვიტერის საკუთარ გვერდზე წერს, რომ საქართველოსთვის ვიზალიბერალიზაციის მინიჭების შესახებ გადაწყვეტილებას ევროკავშირის წევრი ქვეყნების ელჩები სავარაუდოდ 14 სექტემბერს მიიღებენ, ხოლო საბოლოო გადაწყვეტილება 8 ოქტომბრის საპარლამენტო არჩევნების შემდეგ გახდება ცნობილი, როდესაც იუსტიციისა და შინაგან საქმეთა მინისტრთა საბჭო გამართავს შეხვედრას, 13-14 ოქტომბერს, ლუქსემბურგში.

პროცესის დადებითად წარმართვის შემთხვევაში, საქართველოსთვის უვიზო რეჟიმის მინიჭების საკითხს ევროპარლამენტის პლენარულ სხდომაზე გაიტანენ. საბოლოო გადაწყვეტილების დასამტკიცებლად, ასევე საჭიროა ევროკავშირის საბჭოს თანხმობაც.