ვენესუელის დროებითი პრეზიდენტი, ხუან გუაიდო მზად არის, აფხაზეთისა და ე.წ. სამხრეთ ოსეთის დამოუკიდებლობის აღიარება გააუქმოს. ამის შესახებ ამერიკის შეერთებულ შტატებში ვენესუელის ახალმა წარმომადგენელმა, გუსტავო ტარემ რუსთავი 2-თან ექსკლუზიურ ინტერვიუში თქვა. ვენესუელამ აფხაზეთისა და ცხინვალის რეგიონის დამოუკიდებლობა 2008 წლის 10 სექტემბერს აღიარა.

მისი თქმით, ისინი ნიკოლას მადუროს ადმინისტრაციის პოლიტიკის წარმოებას არ აპირებენ.

"თქვენ არც კი უნდა დამისვათ ეს შეკითხვა... ჩვენ რუსეთის ფედერაციის არ გვეშინია", — თქვა ტარემ.

ვენესუელის ეროვნული ასამბლეის თავმჯდომარემ, ხუან გუაიდომ ქვეყნის დროებით პრეზიდენტად თავი 24 იანვარს გამოაცხადა. მისივე თქმით, ის დაასრულებს ქვეყანაში ნიკოლას მადუროს დიქტატორულ რეჟიმს, ჩამოაყალიბებს გარდამავალ მთავრობას და სამართლიან საპრეზიდენტო არჩევნებს ჩაატარებს.

გუაიდოს ლეგიტიმურობა ლათინური ამერიკის ბევრმა ქვეყანამ აღარა. მხარდამჭერებს შორის არიან აშშ, კანადა, ევროკავშირის წევრი ქვეყნები და საქართველო. აშშ-მ ვენესუელის კუთვნილ ნავთობკომპანიას სანქციებიც დაუწესა.

ნიკოლას მადუროს ქვეყანაში ჯარისა და უზენაესი სასამართლოს მხარდაჭერა აქვს. გარდა ამისა, მის ლეგიტიმურობას აღიარებენ რუსეთი, ჩინეთი, თურქეთი, ირანი, კუბა და აფხაზეთისა და სამხრეთ ოსეთის დე ფაქტო რესპუბლიკები.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, ნიკოლას მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა. მადუროს არალეგიტიმურ პრეზიდენტად მიიჩნევს საქართველოს ხელისუფლებაც.

ამავე თემაზე: