ექს-პრეზიდენტის, მიხეილ სააკაშვილის თქმით, საქართველოში უფრო მძიმე სოციალური ფონია, ვიდრე ვენესუელაში, სადაც მოსახლეობის ნაწილი და ოპოზიცია ნიკოლას მადუროს რეჟიმის დამხობას ცდილობს.

"ეს იზომება ბევრი რაღაცით და ინფლაციის პროცენტებით არ იზომება მარტო. ვენესუელა ზოგადად უფრო მდიდარი საზოგადოებაა, ვიდრე საქართველო. გადინება პროცენტული უფრო მაღალია, ვიდრე ვენესუელიდან", — აღნიშნა სააკაშვილმა გადაცემა კვირის აქცენტებში.

ვენესუელა ბოლო რამდენიმე წელია მძიმე სოციალურ და ეკონომიკურ კრიზისშია. 2018 წელს ქვეყანაში ინფლაციამ 2 007 563 646%-ს მიაღწია. ქვეყნის მოსახლეობის უმრავლესობა უკიდურეს სიღარიბეშია. მძიმეა ვითარება ადამიანის უფლებები კუთხით. მადუროს რეჟიმს პრესის თავისუფლებისა და ადამიანის უფლებების შეზღუდვაში ადანაშაულებენ. ვენესულეაში აპატიმრებენ აქციის ორგანიზატორებსა და მონაწილეებს, დაიხურა არაერთი ოპოზიციური გამოცემა.

საკვების გარდა, ქვეყანაში ასევე არის მედიკამენტების მწვავე დეფიციტი. გარდა ამისა, ვენესუელაში უმძიმესი ენერგოკრიზისია.

ლათინური ამერიკისა და დასავლეთის ქვეყნები არ აღიარებენ 2018 წლის საპრეზიდენტო არჩევნებს, სადაც ნიკოლას მადურომ მეორე ვადით გაიმარჯვა. ისინი ქვეყანაში ახალი დემოკრატიული არჩევნების ჩატარებას ითხოვენ.

ამავე თემაზე: