ადამიანის უფლებების სწავლებისა და მონიტორინგის ცენტრის (EMC) ინფორმაციით, შინაგან საქმეთა სამინისტროს წარმომადგენლები პანკისის ხეობაში ჰესების კასკადის მშენებლობის მოწინააღმდეგე თემის წევრებსა და აქტივისტებს ავიწროებენ. საუბარია 2019 წლის 29 იანვარს პანკისის ხეობაში გამართულ სახალხო კრებაზე, სადაც ადგილობრივებმა ჰესების კასკადის მშენებლობის საკითხზე იმსჯელეს.

ორგანიზაციის ინფორმაციით, კრების შემდეგ შსს-ს წარმომადგენლებმა კახეთის პოლიციის დეპარტამენტში დაიბარეს ხეობაში მცხოვრები ის რამდენიმე უხუცესი, რომლებიც კრების შეხვედრაზე ღიად ეწინააღმდეგებოდნენ ჰესების მშენებლობას. მათ რამდენიმე საათის განმავლობაში ყოველგვარი სამართლებრივი საფუძვლის გარეშე ჰესების მშენებლობის მხარდაჭერის აუცილებლობაში არწმუნებდნენ.

"პანკისის ხეობაში ჰესების მშენებლობის პროცესის ღია მხარდაჭერა შსს-ს მხრიდან და ამ პროცესში საპოლიციო აპარატისა და კონტროლის მექანიზმების გამოყენება არსებითად ეწინააღმდეგება სამინისტროს კანონით გათვალისწინებულ მანდატს, კომპეტენციებს და სამართალდამცავი ორგანოების მიმართ საზოგადოებრივ ნდობას ასუსტებს. ჰესების მშენებლობასთან დაკავშირებული უკმაყოფილების გამოხატვა ხეობაში არსებითად მშვიდობიან ხასიათს ატარებს და ამ პროცესში შსს-ს ინტერვენციის სამართლებრივი საფუძვლები არ არსებობს", — ვკითხულობთ განცხადებაში.

ორგანიზაცია შსს-ს მოუწოდებს განმარტოს:

  • რა სამართლებრივი საფუძვლით და წესით იბარებს ადგილობრივ მოსახლეობის პოლიციაში და რა საფუძვლით ცდილობს ჰესების მშენებლობისთვის მათი მხარდაჭერის მოპოვებას;
  • დაუყოვნებლივ შეწყვიტოს პანკისის ხეობის მოსახლეობის დაშინებისა და მათი გამოხატვის თავისუფლების შეზღუდვა;
  • დაიწყოს დისციპლინური დევნა ყველა იმ გადაწყვეტილების მიმღები პირის მიმართ, რომელიც ადგილობრივი თემის თვითნებური შევიწროებისა და კონტროლის პროცესში არის ჩართული.