"გირგვლიანის მკვლელები ციხეში ჩავსვი მე", — ასე უპასუხა სააპელაციო სასამართლოს უვადო მოსამართლემ, ლევან მურუსიძემ სანდრო გირგვლიანის საქმესთან დაკავშირებულ კითხვებს.

უზენაეს სასამართლოში მოსამართლეების არჩევის კრიტერიუმებთან და წესთან დაკავშირებით სასტუმრო რედისონ ბლუ ივერიაში სამუშაო ჯგუფის პირველი შეხვედრა გაიმართა. შეხვედრის პარალელურად სასტუმრო წინ საპროტესტო აქცია მიმდინარეობდა.

შეხვედრის დაწყებამდე სასტუმროსთან ლევან მურუსიძის გამოჩენას აქციის მონაწილეები სტვენითა და შეძახილებით შეხვდნენ.

"სანდრო გირგვლიანი რომ მოკლეს და მკვლელები, რომლებმაც მოკლეს სანდრო გირგვლიანი ციხეში ჩავსვი მე. არ გამოვუშვი, არა. გულზე ხელს დავიდებ და გეტყვი, სანდრო გირგვლიანის მკვლელობაში ბრალი ვისაც ედებოდა ციხეში ჩავსვი მე, გაუნახევრა სასჯელი [მიხეილ] სააკაშვილმა და გაუშვეს პირობით ვადამდე, რაშიც მე მონაწილეობა საერთოდ არ მიმიღია", — უთხრა ლევან მურუსიძემ ერთ-ერთ აქტივისტს.

ლევან მურუსიძე თბილისის სააპელაციო სასამართლოს უვადო მოსამართლედ 27 დეკემბერს გაამწესეს. მის სახელს არაერთ გახმაურებულ საქმესთან არის დაკავშირებული, როგორც წინა ხელისუფლების დროს, ისე ახლა.

ნაციონალური მოძრაობის მმართველობის დროს მან განიხილა სანდრო გირგვლიანის მკვლელობის, სულხან მოლაშვილის და ე.წ. ამბოხებული მოსამართლეების საქმეები. მისი გადაწყვეტილებით გირგვლიანის მკვლელობაში ბრალდებულებს სასჯელები შეუმცირდათ. მოქმედი ხელისუფლების დროს კი მურუსიძემ განიხილა კომპანია აიისას საქმე.

ამავე თემაზე: