ერთიანმა ნაციონალურმა მოძრაობამ და იუსტიციის საბჭოს არამოსამართლე წევრმა, ანა დოლიძემ სამუშაო ჯგუფის შეხვედრა დატოვეს, რადგან შეხვედრის ფორმატი მათთვის მიუღებელია.

დოლიძის თქმით, სანამ საზოგადოებას მეტი გარანტიები არ ექნება, სამუშაო ჯგუფში ყოფნას არ აპირებს.

"დღევანდელ დღეს არავითარი საშუალება, რომ განსხვავებული აზრი იქნას გათვალისწინებული ამ სამუშაო ჯგუფში არ არსებობს. ეს არის ამ პროცესისთვის დემოკრატიულობის ელფერის მინიჭება. რაც არ უნდა ვთქვათ იქ, მაინც აისახება ირაკლი კობახიძისა და მოსამართლეთა ჯგუფის მოსაზრებები", — განაცხადა დოლიძემ შეხვედრის დატოვების შემდეგ. სამუშაო ჯგუფის ფორმატის ცვლილებას ითხოვს ნაციონალური მოძრაობაც.

დღეს, 27 იანვარს უზენაეს სასამართლოში მოსამართლეების შერჩევის წესსა და კრიტერიუმებთან დაკავშირებით მმართველი გუნდის წევრები ოპოზიციისა და იუსტიციის საბჭოს წევრებს შეხვდნენ. შეხვედრაში მონაწილეობაზე უარი თქვა არასამთავრობო ორგანიზაციების ნაწილმა. ისინი მოქალაქეებთან ერთად შეხვედრის პარალელურად სასამართლო სისტემაში რეალური ცვლილებების მოთხოვნით საპროტესტო აქციას მართავდნენ. მათი ერთ-ერთი მოთხოვნა სისტემიდან მურუსიძე-ჩინჩალაძის კლანისა და იუსტიციის უმაღლესი საბჭოდან მურუსიძის უვადოდ დამნიშვნელი წევრების წასვლაა.