27 იანვარს 10 საათზე სასტუმრო რედისონის მიმდებარე ტერიტორიაზე მოქალაქეთა საინიციატივო ჯგუფი სასამართლოს სისტემის ცვლილების მოთხოვნით საპროტესო აქციას გამართავს. აქციის შესახებ ინფორმაციას არასამთავრობო ორგანიზაცია ადამიანის უფლებების სწავლებისა და მონიტორინგის ცენტრი ავრცელებს.

აქცია ჩატარდება სამუშაო ჯგუფის შეხვედრის პარალელურად, რომელშიც მონაწილეობას იღებენ იუსტიციის უმაღლესი საბჭოს, მოსამართლეთა გავლენიანი ჯგუფის და პარლამენტის წარმომადგენლები.

აქციის მონაწილეების მთავარი მოთხოვნაა, იუსტიციის უმაღლესი საბჭოს 11-მა წევრმა, რომლებმაც მხარი დაუჭირეს ლევან მურუსიძის უვადოდ დანიშვნას და ხმა მისცეს უზენაესი სასამართლოს მოსამართლეთა კანდიდატების სიას, დატოვონ თანამდებობა. ასევე თანამდებობებიდან გადადგნენ სასამართლოში არსებული კლანის ლიდერები და წლების განმავლობაში, უსამართლო მართლმსაჯულების შემოქმედი მოსამართლეები, მიხეილ ჩინჩალაძე და ლევან მურუსიძე.

ხვალ, 27 იანვარს, 11 საათზე, საქართველოს პარლამენტის თავმჯომარის, ირაკლი კობახიძის ხელმძღვანელობით სასამართლო რეფორმის სამუშაო ჯგუფის შეხვედრა გაიმართება. შეხვედრის მონაწილეები უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე იმსჯელებენ.