წყალტუბოს მუნიციპალიტეტის საკრებულოს თავმჯდომარე, გრიგოლ ივანეიშვილი საკრებულოს სხდომის დროს დააკავეს. ინფორმაცია ამის შესახებ მუნიციპალიტეტის მრესსამსახურმა On.ge-ს დაუდასტურა.

ამასთან დაკავშირებით ინფორმაცია პირველად რუსთავი 2-მა გაავრცელა. ტელეკომპანიის თქმით, ივანეიშვილი სახელმწიფო უსაფრთხოების სამსახურმა ქრთამის ბრალდებით დააკავა.

სუსმა თავმჯდომარის დაკავება გავრცელებული ინფორმაციიდან რამდენიმე საათში დაადასტურა. უწყების თქმით, გრიგოლ ივანეიშვილი უცხოელ ბიზნესმენს ქალაქ წყალტუბოში მდებარე საკრებულოს ყოფილი შენობის წინასწარ შეთანხმებულ ფასად აუქციონზე გატანასა და შესყიდვაში დახმარებას დაჰპირდა. მათივე განმარტებით, აკრებულოს თავმჯდომარემ სანაცვლოდ ქრთამის სახით 250 000 ლარის გადახდა მოითხოვა.

როგორც განცხადებაში ვკითხულობთ, გრიგოლ ივანეიშვილის ინიციატივით, ქრთამის სახით მოთხოვნილი თანხის გადახდის გარანტად უცხოელმა ბიზნესმენმა მისი კუთვნილი ფირმის 16%-იანი წილი გადაუფორმა ივანეიშვილის ნდობით აღჭურვილ პირს.

2018 წლის 26 დეკემბერს თვითმმართველმა ერთეულმა მუნიციპალიტეტმა წყალტუბოში, შანიძის ქუჩა N1-ში მდებარე შენობა-ნაგებობისა და მიწის ნაკვეთის შესყისდვაზე ელექტრონული ტენდერი გამოაცხადა. გამოძიების ინფორმაციით, უცხოელმა ბიზნესმენმა გრიგოლ ივანეიშვილის დახმარებით შენობა და მიწის ნაკვეთი შეიძინა.

სუს-ის თქმით, დანაშაულის შენიღბვისთვის გრიგოლ ივანეიშვილმა უცხოელ ბიზნესმენთან გააფორმა ფიქტიური სესხის ხელშეკრულება და ამ უკანასკნელს 250 000 ლარი თავის შვილის ანგარიშზე ჩაარიცხინა.

გამოძიება სისხლის სამართლის კოდექსის 338-ე მუხლის მე-3 ნაწილის "ე" ქვეპუნქტით მიმდინარეობს, რაც განსაკუთრებით დიდი ოდენობით ქრთამის აღებას გულისხმობს. დანაშაული სასჯელის სახით 11-დან 15 წლამდე ვადით თავისუფლების აღკვეთას ითვალისწინებს.