ლორა მაკლინი 21 წლის შოტლანდიელი სტუდენტია, რომელიც დიდი ბრიტანეთის რობერტ გორდონის უნივერსიტეტში მენეჯმენტსა და მარკეტინგს სწავლობს.

მომავალ თვეში, ლორას გასაუბრება აქვს მაიკროსოფტთან, რომელიც სტუდენტებს შანსს აძლევს კომპანიაში ერთი წლის განმავლობაში იმუშაონ.

გასაუბრება 2019 წლის 18 თებერვალს, დილის 11 საათზეა დანიშნული, სკაიპით. ლორას თქმით, მან კომპანიაზე ყველა სიახლე მოიძია და მშობლებს, და-ძმასა და მეგობრებს სთხოვა, რომ გასაუბრებაში ევარჯიშებინათ:

"ეს ჩემთვის მნიშვნელოვანი შანსია და მისი ხელიდან გაშვება არ მინდოდა".

როგორც ხვდებით, 21 წლის სტუდენტს ამ სამუშაოს მიღება ძალიან სურს. იმდენადაც კი, რომ გასაუბრებაზე ერთი თვით ადრე, 18 იანვარს, გამოცხადდა:

"დილით ჩვეულებრივზე ბევრად ადრე გავიღვიძე, ვისაუზმე, მოსახერხებელი ტანსაცმელი ჩავიცვი, თმები და მაკიაჟი გავიკეთე, მოხერხებულად მოვეწყე და რამდენიმე სიახლეს კიდევ ერთხელ გადავხედე".

11 საათისთვის ის კომპიუტერის წინ იჯდა, სკაიპი ჰქონდა ჩართული და ზარს მოუთმენლად ელოდა.

"12-ის 15 წუთზე პანიკა დამეწყო. შევამოწმე ინტერნეტიც, საბოლოოდ კი გადავწყვიტე, რომ გასაუბრების ოფიცერისთვის მიმეწერა", - ამბობს ის ბაზფიდთან.

ლორასა და მაიკროსოფტის წარმომადგენელს შორის ასეთი დიალოგი წარიმართა:

— მოგესალმებით, ჯერ კიდევ არ მიმიღია ზარი თქვენგან, ყველაფერი კარგადაა?

— ძვირფასო ლორა, შენი ინტერვიუ 18 თებერვალსაა დანიშნული. იმავე დროს.

— დიახ, დღეს 18 თებერვალია, და გასაუბრება 11 საათზე იყო ჩანიშნული, მე კი ზარი ისევ არ მიმიღია. ბოდიში უხერხულობისთვის, უბრალოდ ძალიან დავიბენი.

— დღეს 18 იანვარია, თქვენი გასაუბრება კი 18 თებერვალსაა ჩანიშნული.

"მინდოდა ჰაერში გავმქრალიყავი. მაიკროსოფტში ალბათ ფიქრობენ, რომ იდიოტი ვარ", - აღწერს ლორა თავის განცდებს და დასძენს, რომ სამუშაოს მიღების იმედი აღარ აქვს.

როგორც ამბობს, ყველაზე უარესი ამ ამბავში ისაა, რომ 14 თებერვალს 22 წლის ხდება და გასაუბრებას ისე ელოდა, რომ თავისი დაბადების დღეც კი დაავიწყდა.

სამაგიეროდ, მან სოციალურ ქსელში პოპულარობა მოიპოვა და მის ტვიტს ახლა უკვე 186 ათასზე მეტი მოწონება აქვს.

უამრავმა ადამიანმა მას მხარდაჭერაც გამოუცხადა.

"შენ დედლაინი 1 თვით ადრე დაასრულე, ეს ნამდვილად შთამბეჭდავია".

"— რა არის შენი უდიდესი სისუსტე?

— ვერ ვიტან დაგვიანებას".

"კი, შენ აჩვენე, როგორი პუნქტუალური ხარ".

როგორც ლორა ამბობს, დადებითმა გამოხმაურებებმა თავი უკეთ აგრძნობინა. მისი თქმით, მაიკროსოფტს ბოდიშიც მოუხადა.

"არ ინერვიულო, შეცდომები ყველას მოგვდის : ) ინტერვიუსთვის ახალ მოწვევას გამოგიგზავნით", - მიიღო მან პასუხად ტექგიგანტისგან.