ბავშვთა სამყაროს დაზარალებულებმა თბილისის მერიასა და დედაქალაქის საკრებულოს სააპელაციო სასამართლოში დავა მოუგეს. საუბარია იმ დაზარალებულებზე, რომლებსაც ბავშვთა სამყაროს შენობის დაწვის შემდეგ კომპენსაცია არ გადაუხადეს.

როგორც დაზარალებულთა ადვოკატმა, ფრიდონ სიხუაშვილმა On.ge-სთან საუბრისას თქვა, სააპელაციო სასამართლომ ძალაში დატოვა საქალაქო სასამართლოს გადაწყვეტილება და თბილისის მერიასა და საკრებულოს 32 დაზარალებულისთვის ერთჯერადი, 3 000-ლარიანი კომპენსაციის გადახდა დააკისრა.

"ბავშვთა სამყაროს დაზარალებულთა ნაწილს 2017 წელს გაეწია ერთჯერადი, 3 000-ლარიანი დახმარება, ნაწილს კი ამ დახმარებაზე უარი უთხრეს. ჩვენ ეს გადაწყვეტილება ჯერ თბილისის მერიაში გავასაჩივრეთ და მოვითხოვეთ ამ თანხის გამოყოფა და ყველა დაზარალებულის დაკმაყოფილება და უარის შემდეგ წავედით სასამართლოში", — განმარტავს ადვოკატი.

18 მაისს თბილისის საქალაქო სასამართლომ ბავშვთა სამყაროს დაზარალებულების მოთხოვნა დააკმაყოფილა და მერიასა და საკრებულოს მათთვის 3000-ლარიანი კომპენსაციის გადახდა დააკისრა. საქალაქო სასამართლოს ეს გადაწყვტილება მოპასუხე მხარემ სააპელაციო სასაართლოში გაასაჩივრა.

თბილისში, სავაჭრო ცენტრ ბავშვთა სამყაროში 2017 წლის 30 იანვარს, გამთენიისას გაჩენილი ხანძრის შედეგად სრულიად განადგურდა შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.