სასამართლოს გადაწყვეტილებით სავაჭრო ცენტრ ბავშვთა სამყაროს ხანძრის შედეგად დაზარალებულებს 3000-ლარიანი კომპენსაცია უნდა გადაეცეთ. ერთ წელზე მეტი გავიდა მას შემდეგ, რაც იმ დროინდელმა საკრებულოს თავმჯდომარემ, გიორგი ალიბეგაშვილა თქვა, რომ სახელმწიფო "კეთილ ნებას გამოიჩენდა" მოვაჭრეებს ერთჯერადად დაეხმარებოდა.

დღეს, 18 მაისს საქალაქო სასამართლოს ადმინისტრაციულ საქმეთა კოლეგიამ, სრულად დააკმაყოფილა 33 მოსარჩელის სასარჩელო მოთხოვნა, მოპასუხეების - თბილისის საკრებულოსა და მერიის მიმართ.

მოსარჩელეთა განმარტებით, 2017 წლის 10 აპრილს, თბილისის საკრებულომ, რიგგარეშე სხდომაზე მიიღო გადაწყვეტილება დაზარალებულთათვის ერთჯერადი დახმარების სახით 3000 ლარის გაცემის თაობაზე. მთავარი პროკურატურის მიერ მინიჭებული "დაზარალებულის" სტატუსის მიუხედავად, მოსარჩელე პირებზე, დახმარება არ გასცეს.

მოსარჩელეებმა განმარტეს, რომ 2017 წლის 15 აგვისტოს ერთჯერადი დახმარების გაცემის მოთხოვნით, უშედეგოდ მიმართეს ადმინისტრაციულ ორგანოებს, თუმცა მათ განცხადებას რეაგირება არ მოჰყოლია.

მოპასუხეთა განმარტებით, სავაჭრო ცენტრ ბავშვთა სამყაროს ხანძრის შედეგად დაზარალებულ პირთათვის ერთჯერადი დახმარების გასაწევად, მუნიციპალიტეტის ბიუჯეტიდან მოიძიეს ფინანსური ხარჯები. დაზარალებულთა სიების დაზუსტების მიზნით, მათივე დავალებით კერძო კომპანიებმა წარადგინეს იმ პირთა სიები, რომლებიც დაზარალებულებთან სამართლებრივ ურთიერთობაში იყვნენ. დაზუსტებულ სიებში ვერ მოხვდნენ მოსარჩელეები, ვინაიდან კერძო კომპანიებს მათ შესახებ ინფორმაცია არ მიუწოდებიათ.

თბილისში, სავაჭრო ცენტრ ბავშვთა სამყაროში 30 იანვარს, გამთენიისას გაჩენილი ხანძრის შედეგად სრულიად განადგურდა შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.