ქართული ოცნების დეპუტატი ეკა ბესელია ჯვრის მონასტერსა და მის წინამძღვარს სოლიდარობასა და მხარდაჭერას უცხადებს.

"ვიცი რამდენად რთული იყო მისთვის ამ გადაწყვეტილების მიღება. უკიდურეს მდგომარეობამდე მიიყვანეს მოძღვარი. 1997 წლიდან მრევლი ვარ ამ მონასტრის და ვიცნობ მამა კონსტანტინეს როგორი დიდბუნებოვანი და საოცრად კარგი ადამიანია", — ნათქვამია ბესელია ფეისბუქპოსტში.

მისი თქმით, მონასტრის წინ ანტისანიტარია და მოუწესრიგებლობაა, გარდა ამისა, ირღვევა კანონი, რადგან გარევაჭრობა აკრძალულია.

"მე პირადად მივმართე არაერთი წერილით მცხეთის მუნიციპალიტეტს როგორც იურიდიული კომიტეტის თავმჯდომარემ, გუბერნატორს კანონის აღსრულების მიზნით. რატომ არ ხდება კანონის დაცვა და აღსრულება - ამაზე უნდა ისაუბროს მერმა და პასუხისმგებელმა პირებმა. იმედია სამართლებრივად მოგვარდება ეს საკითხი, ნაცვლად მონასტრის მოძღვრის გაკიცხვისა", — აღნიშნა დეპუტატმა.

გარევაჭრობის გამო მცხეთის ჯვრის მონასტრის კარები ვიზიტორებისთვის მესამე დღეა დაკეტილია. გადაწყვეტილება ამის შესახებ ტაძრის წინამძღვარმა, კონსტანტინე ჯინჭარაულმა მიიღო.

ჯვრის მონასტერთან მისულმა მცხეთის მერმა, გიორგი კაპანაძემ განაცხადა, რომ გარემოვაჭრეების გამო მონასტრის დაკეტვა მიუღებელი და სამარცხვინო ფაქტია. მისი თქმით, ადგილი, სადაც გარემოვაჭრეები დგანან მუნიციპალიტეტის ტერიტორიაა და არა მონასტრის.

საქართველოს საპატრიარქოს განცხადებით, ჯვრის მონასტერთან შექმნილი ვითარება გარემოვაჭრეების საქმიანობის მოწესრიგებისათვის გადადგმული ნაბიჯია.

"ჩვენ გვესმის, რომ ხალხს უჭირს და ლუკმა-პურის საშოვნელად სხვადასხვა საშუალებას მიმართავს, მაგრამ როდესაც ამდენი ტურისტი და მომლოცველი ჰყავს ქვეყანას უხერხულია, ეს ტაძრები თავისი დიდებულებით გვიყურებდნენ წარსულიდან და XXI საუკუნის საქართველო კი მათ გვერდით მიუღებელი და მოუწესრიგებელი სახით იყოს წარმოჩენილი"

მცხეთის ჯვრის მონასტერი VI საუკუნის კულტურული ძეგლია, რომელიც ტურისტებს შორის დიდი პოპულარობით სარგებლობს. ის მსოფლიო კულტურული მემკვიდრეობის ძეგლთა სიაში არის შეტანილი.