ჯვრის მონასტერთან მისულმა მცხეთის მერმა, გიორგი კაპანაძემ განაცხადა, რომ გარემოვაჭრეების გამო მონასტრის დაკეტვა მიუღებელი და სამარცხვინო ფაქტია. ამის შესახებ მან მონასტრის ერთ-ერთ ბერს უთხრა, რომელმაც ურჩია მონასტრის წინამძღვრისთვის მიემართა.

მერმა განაცხადა, რომ ადგილი, სადაც გარემოვაჭრეები დგანან მუნიციპალიტეტის ტერიტორიაა და არა მონასტრის.

"წვიმაში, თოვლში, ავდარში ეს ხალხი დგას აქ ამდენი წლის განმავლობაში და ვაჭრობს და მე უბრალოდ ადამიანური თვალსაზრისიდან გამომდინარე ვერ ავუკრძალავ მათ ლუკმა-პურის შოვნას", — განაცხადა კაპანაძემ.

გარევაჭრობის გამო მცხეთის ჯვრის მონასტრის კარები ვიზიტორებისთვის მეორე დღეა დაკეტილია. გადაწყვეტილება ამის შესახებ ტაძრის წინამძღვარმა, კონსტანტინე ჯინჭარაულმა მიიღო.

საპატრიარქოს პრესსამსახურის ხელმძღვანელმა, დეკანოზ ანდრია ჯაღმაიძემ On.ge-ს უთხრა, რომ ტაძრის დაკეტვის მიზეზი მოუწესრიგებელი გარევაჭრობა გახდა, რომელიც "გარემოს ამახინჯებდა და შეუფერებელ სიტუაციას ქმნიდა".

მცხეთის ჯვრის მონასტერი VI საუკუნის კულტურული ძეგლია, რომელიც ტურისტებს შორის დიდი პოპულარობით სარგებლობს. ის მსოფლიო კულტურული მემკვიდრეობის ძეგლთა სიაში არის შეტანილი.