აშშ-ს ფედერალური მთავრობის მუშაობის დროებითმა შეჩერებამ ანუ ე.წ.-მა შათდაუნმა ხანგრძლივობის რეკორდი მოხსნა. უკვე 22-ე დღეა, რაც მთავრობა არ მუშაობს. ამ დრომდე ყველაზე ხანგრძლივი "შათდაუნი" 1995 წელს ბილ კლინტონის პრეზიდენტობის დროს იყო. ის 21 დღე გაგრძელდა.

უცნობია, როდის დასრულდება მიმდინარე "შათდაუნი. ეს პროცესი გავლენას ახდენს ფედერალურ მთავრობასა და ათასობით სახელმწიფო მოხელეზე. დაახლოებით 800 000 სახელმწიფო მოხელე დაზარალდა, რადგან ისინი ან ანაზღაურების გარეშე მუშაობენ ან საერთოდ არ მუშაობენ და შესაბამისად, ანაზღაურებასაც არავინ იხდის.

პრეზიდენტი დონალდ ტრამპი აცხადებს, რომ, თუ 2019 წლის ბიუჯეტში 5,6 მილიარდ აშშ დოლარს სასაზღვრო უსაფრთხოებასა და მექსიკასთან საზღვარზე ფიზიკური ბარიერის მშენებლობის დაფინანსებაზე არ გამოუყოფენ, ბიუჯეტს ხელს არ მოაწერს.

დემოკრატები, რომლებმაც კონგრესში უმრავლესობა მოიპოვეს, მშენებლობის დაფინანსებაზე უარს ამბობენ და აცხადებენ, რომ პრეზიდენტი კრიზისს ხელოვნურად ქმნის. ამერიკის პრეზიდენტი დონალდ ტრამპი ამბობს, რომ მან შესაძლოა სულ მალე ქვეყანაში საგანგებო მდგომარეობა გამოაცხადოს. თეთრი სახლის ინფორმაციით, პარასკევს, ნაშუადღევს, მრგვალი მაგიდის ირგვლივ დონალდ ტრამპი და შტატების, ადგილობრივი მთავრობებისა და თემის ლიდერები შეიკრიბებიან.