იუსტიციის უმაღლესი საბჭოს არამოსამართლე წევრი უზენაესი სასამართლოს მოსამართლეობის კანდიდატების არჩევის საკითხზე ათამდე ყოფილ მოსამართლეს ხვდება. შეხვედრას ესწრებიან უზენაესი სასამართლოს ყოფილი მოსამართლეებიც, მათ შორის თემურ თორდია და ნუნუ კვანტალიანია.

ნაზი ჯანეზაშვილის თქმით, საინტერესოა, რას ფიქრობენ ყოფილი მოსამართლეები უზენაესი სასამართლოს მოსამართლეობის კანდიდატების არჩევის წესთან დაკავშირებით.

"მათი აზრის მოსმენა მნიშვნელოვანია განსაკუთრებით იმ ადამიანებისთვის, რომლებიც ჩართულები არიან ამ პროცესში და სხვადასხვა ფორმით მონაწილეობენ პროცედურების შემუშავებაში. ყოფილი მოსამართლეების ხმა უნდა ისმოდეს, რადგან მათ ძალიან კარგად იციან ის გამოწვევები, პრობლემები, რაც სასამართლო სისტემაშია და ბევრმა მათგანმა თავის თავზე გამოსცადა ის წლები, რასაც კლანი ახორციელებს", — განაცხადა ნაზი ჯანეზაშვილმა.

შეხვედრაზე, ასევე, განიხილავენ იმ კანონპროექტს, რომელსაც იუსტიციის უმაღლესი საბჭოს არამოსამართლე წევრები ნაზი ჯანეზაშვილი და ანა დოლიძე პარლამენტში უახლოეს კვირაში შეიტანენ. კანონპროექტით, უზენაესი სასამართლოს მოსამართლეობის კანდიდატების შერჩევის წესს ეხება. ნაზი ჯანეზაშვილის თქმით, კანონპროექტით უნდა შეიზღუდოს იმ მოსამართლეობის კანდიდატების წარდგენა, რომლებიც ამავდროულად იუსტიციის უმაღლესი საბჭოს წევრებიც არიან. ჯანეზაშვილი ფიქრობს, რომ ეს ინტერესთა კონფლიქტია.

მისივე განმარტებით, ის პარლამენტს სთავაზობს ღია კონკურსის წესს, სადაც მოსამართლეობის მსურველები მიიღებენ მონაწილეობას. კონკურსანტებს განიხილავს და შეარჩევს კომისია, რომელიც სიას შემდგომ პარლამენტს გადაუგზავნის. ნაზი ჯანეზაშვილის თქმით, ეს სისტემა დაიცავს სასამართლოს იმ ტიპის პრობლემებისგან, რაც ახლა წარმოიშვა.

ამავე თემაზე: