ამაზონის აღმასრულებელმა დირექტორმა, ჯეფ ბეზოსმა განაცხადა, რომ მისი 25-წლიანი ქორწინება დასრულდა.

ბიზნესმენმა, რომლის ღირებულება $160 მილიარდია, ტვიტერზე მისი და მაკენზი ბეზოსის საერთო განცხადება გამოაქვეყნა.

"გვინდა, საზოგადოებას ვაცნობოთ ჩვენი ცხოვრების განვითარების შესახებ. როგორც ჩვენმა ოჯახებმა და ახლო მეგობრებმა იციან, ხანგრძლივი ურთიერთობისა და საცდელი განცალკევების მერე გადავწყვიტეთ, რომ განვქორწინდეთ და ცხოვრება მეგობრების სტატუსით გავაგრძელოთ. წარმოუდგენლად გაგვიმართლა, რომ ერთმანეთი ვიპოვეთ და უზომოდ მადლიერები ვართ ერთად გატარებული თითოეული წლის გამო. ყველაფრის თავიდან დაწყება რომ შეგვეძლოს, ისევ ასე მოვიქცეოდით. როგორც დაქორწინებულ წყვილს, საოცარი ცხოვრება გვქონდა და წინ არაჩვეულებრივი მომავალი გველოდება როგორც მშობლებს, მეგობრებსა თუ საქმიან პარტნიორებს. შეიძლება, ტიტული შეგვეცვალა, მაგრამ ჩვენ ისევ ვრჩებით ოჯახად", - ნათქვამია განცხადებაში.

ჯეფი და მაკენზი ერთმანეთს 1994 წელს, ნიუ-იორკის საინვესტიციო ფონდში მუშაობისას შეხვდნენ და ექვს თვეში დაქორწინდნენ.

მილიარდერი ხშირად აღნიშნავდა, რომ მისმა მეუღლემ ამაზონის წარმატებაში დიდი როლი ითამაშა. გასულ წელს ჯეფ ბეზოსმა ინტერვიუში ახსენა, რომ ის ჭკვიან ქალს ეძებდა, რომელიც "მესამე მსოფლიოს ციხიდან" დაიხსნიდა.

ჯეფ ბეზოსი ამჟამად პლანეტის უმდიდრესი ადამიანია. მისი ქონება 2017-დან 2018 წლამდე $60 მილიარდით გაიზარდა, რითაც მან მაიკროსოფტის თანადამფუძნებელ ბილ გეიტსს გადაასწრო.