რუსეთის პატრიარქი კირილე, უკრაინის ეკლესიის ავტოკეფალიის მოპოვებაში პრეზიდენტ პოროშენკოს ჩართულობას აპროტესტებს და ირწმუნება, რომ მსგავს რამეს რუსეთის პრეზიდენტი არასდროს იკადრებდა.

"შეგიძლიათ წარმოიდგინოთ, რა მოხდება რუსეთის პრეზიდენტი ვლადიმერ პუტინი, რომ დაესწროს საეკლესიო კრებას? ის, რომ პირდაპირ ამბობდეს, ვინ უნდა აირჩიონ და შემდეგ თავად წარუდგინოს პატრიარქი საზოგადოებას? ასეთი რამ რთული წარმოსადგენია", — აცხადებს კირილე, რომელსაც წლებია პუტინთან მეგობრობასა და კრემლის ინტერესების გატარებაში ადანაშაულებენ.

მისი თქმით, უკრაინის ეკლესიაში მიმდინარე მოვლენები "აბსურდის თეატრია" და იგივე რომ რუსეთში მომხდარიყო, ამაზე მთელი მსოფლიო ილაპარაკებდა.

"აუუ, სად არის ევროპა? აუუუ, სად არის შეეერთებული შტატები? სად არიან, მათი სურვილით დაიცვან ლიბერალიზმის ფუნდამენტური პრინციპები, რომელიც ეკლესიის სახელმწიფოსგან გამოყოფას გულისხმობს", — დაამატა პატრიარქმა.

უკრაინის ეკლესიის ავტოკეფალია და რუსეთი

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. ამ გადაწყვეტილებას მხარი დაუჭირეს უკრაინის პრეზიდენტმა, პეტრო პოროშენკომ და უმაღლესმა რადამ. პოროშენკო ამბობდა, რომ უკრაინელმა ხალხმა არ უნდა ილოცოს იმ სულიერი წინამძღოლისთვის, რომელიც კრემლის ინტერესებს ატარებს.

უკრაინის ეკლესიისთვის ავტოკეფალიის მინიჭების საკითხი მსოფლიო პატრიარქსა და რუსეთის საპატრიარქოს შორის განხეთქილების მიზეზად იქცა. სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.

6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს ტომოსი ანუ ბრძანება გადასცა, რითაც ახალი ეკლესიის შექმნა ფორმალურად დასრულდა. ტომოსის გადაცემის ცერემონიას დაესწრნენ უკრაინის მთავრობის წევრები, უმაღლესი რადას სპიკერი და პრეზიდენტი პეტრო პოროშენკო.