ნეტფლიქსზე Black Mirror: Bandersnatch-ის დადების შემდეგ სულ უფრო აქტუალური გახდა კითხვა, როგორ ვუყუროთ ამ ახალ, სრულიად უნიკალურ და ინტერაქტიულ 5-საათიან ფილმს ისე, რომ სიუჟეტის მართვით სრული სიამოვნება მივიღოთ.

ფილმი, სადაც მაყურებელი თავად წყვეტს, რა უნდა მოხდეს, სწორედ იმ ტიპის კონტენტია, რომელსაც ვერც ტორენტებზე ნახავთ და ვერც ქართულ საიტებზე. ამ ფორმატის "მოპარვა" პრაქტიკულად შეუძლებელია.

ჰოდა, დადგა დრო, ვილაპარაკოთ იმაზე, რა აქვს ნეტფლიქსს ისეთი, რის გამოც მასზე მთელი მსოფლიო გიჟდება, ოღონდ იმ ქვეყნების გამოკლებით, სადაც მოპარული კონტენტი ჩვეულებრივი ამბავია.

რა არის ნეტფლიქსი

ნეტფლიქსი მედიასფეროს გიგანტია, რომელიც 1997 წელს დაარსდა. კომპანია თავდაპირველად DVD-ზე ჩაწერილ ფილმებს აქირავებდა, მოგვიანებით კი, ტექნოლოგიების განვითარებასთან ერთად, მედიაპროვაიდერად ჩამოყალიბდა. ამჟამად ნეტფლიქსს 200-მდე ქვეყანაში 137 მილიონზე მეტი მომხმარებელი ჰყავს.

ნეტფლიქსი აერთიანებს როგორც ძველ/ახალ ფილმებს, სატელევიზიო სერიალებსა თუ გადაცემებს, ასევე კონტენტს, რომელიც მისი დაკვეთით იქმნება. კომპანიის ცნობილი სერიალებია Stranger Things, Narcos, Maniac, The Crown და ასე შემდეგ. რაც შეეხება ნეტფლიქსის ფილმებს, ერთ-ერთი ყველაზე წარმატებული მაგალითი ალფონსო კუარონის ახალი სურათი Roma-ა, რომელიც წელს ოსკარზე საუკეთესო ფილმის ნომინაციაში ერთ-ერთ მთავარ პრეტენდენტად მიიჩნევა.

რა უპირატესობა აქვს ნეტფლიქსს

ფოტო: Netflix Screenshot

პირველ რიგში - არავითარი რეკლამები. გარდა ამისა, ყველა ფილმი თუ სერიალი სუბტიტრებით და HD ხარისხით დევს. ნეტფლიქსის აპლიკაცია, რომლითაც მობილურში გაჭედვის გარეშე ნახავთ საყვარელ სერიალებს, მრავალსაათიან მგზავრობებს შეგიმსუბუქებთ. კიდევ ერთი პლუსი კი ისაა, რომ შეგიძლიათ ფილმები თუ სერიები აპლიკაციაშივე გადმოწეროთ და წინასწარ მოიმარაგოთ.

ამგვარად, ფილმების კომპიუტერში გადმოწერა და მობილურში გადატანა აღარ მოგიწევთ.

რაც შეეხება თავად ნეტფლიქსის სერიალებს, საიტზე მათი ახალი სეზონები ერთიანად თავსდება, რაც იმას ნიშნავს, რომ შეგიძლიათ მთელი შაბათ-კვირა საყვარელი სერიალის ყურებაში გაატართ.

2013 წლისთვის ნეტფლიქსს მხოლოდ რამდენიმე ორიგინალური სერიალი ჰქონდა, 2018 წლის ბოლოს კი მათი რიცხვი 650-მდე გაიზარდა. აღსანიშნავია ისიც, რომ 2018 წელს სტრიმინგ სერვისმა კონტენტის მიმართულებით $8 მილიარდი დახარჯა და არაერთი მნიშვნელოვანი პროექტი დააფინანსა. მათ შორის იყო Bird Box, სანდრა ბულოკის მონაწილეობით, რომელიც უკვე შეფასდა, როგორც ამ წლის ერთ-ერთი ყველაზე საინტერესო ფილმი. სურათმა ნეტფლიქსის რეკორდიც მოხსნა და ერთი კვირის განმავლობაში 45 მილიონზე მეტი ადამიანი დააინტერესა.

ნეტფლიქსის წარმატების კიდევ ერთი მიზეზი მისი დახვეწილი ალგორითმია. ის თქვენ მიერ ნანახ ყოველ ფილმს, გადაცემასა თუ სერიას ანალიზს უკეთებს, რის შედეგადაც სწორედ თქვენზე მორგებულ ინტერფეისს გთავაზობთ.

იმისთვის, რომ კონტენტის ზღვაში არ დაიკარგოთ, ფილმებს, გადაცემებსა თუ სერიალებს (თუ ძალიან ახალი გამოსული არაა) თქვენს გემოვნებასთან შეთავსების პროცენტული მაჩვენებელი აწერია. იმის შანსი, რომ 98%-იანი შეთავსებით მონიშნულმა ფილმმა უკმაყოფილო დაგტოვოთ, მინიმალურია.

რა დევს ნეტფლიქსზე ისეთი, რასაც ქართულ საიტებზე ვერ წააწყდებით?

სატელევიზიო გადაცემები, მრავალფეროვანი კულინარიული შოუები, დოკუმენტური ფილმები, სპეციალური კოლაბორაციული პროექტები (მაგალითად, Vox-ის ან Buzzfeed-ის გადაცემები სოციალურ თემებზე), სტენდაფები, რომელთაც ქართულ საიტებზე ან დიდხანს უნდა ელოდოთ, ან სულაც - ტყუილად და ასე შემდეგ. მოკლედ რომ ვთქვათ, თუ სერიალები Game of Thrones-ის მიღმაც გაინტერესებთ, ხოლო ფილმები - ქართული კინოთეატრების მიერ შერჩეული ჰიტების მიღმა, ნეტფლიქსი თქვენთვის ახალი სამყაროს კარს შეაღებს.

თქვენ მიერ გადახდილი ფული სწორედ იმ სერიალებისა თუ ფილმების შემქმნელებზე გადანაწილდება, რომელთაც დრო დაუთმეთ. ასე რომ, მშვიდი სინდისით შეგიძლიათ უყუროთ ლეგალურ კონტენტს.

რა ღირს ნეტფლიქსი?

ფოტო: Giphy

ნეტფლიქსის მინიმალური პაკეტის ფასი 8 ევროა, თუმცა კიდევ უფრო ეკონომიური გზაც არსებობს. შეგიძლიათ, პრემიუმ პაკეტი იყიდოთ (11.99 ევრო) და სამ მეგობართან ერთად გაინაწილოთ. ამგვარად, თითოეულ თქვენგანს თვეში 3 ევროს, ანუ 9 ლარის გადახდა მოუწევს.

პირველი თვე უფასოა, საცდელი ვადის გასვლის შემდეგ კი თავად შეგიძლიათ გადაწყვიტოთ, გიღირთ თუ არა ამ სერვისში თანხის გადახდა.

კიდევ ერთი სასიამოვნო ამბავი ისაა, რომ პაკეტის ყიდვის შემდეგ ავტომატურად ჩნდება ანგარიში "ბავშვები", სადაც მხოლოდ მცირეწლოვნებისთვის შესაფერისი ანიმაციები, ფილმები თუ გადაცემები დევს. ენის ბარიერის გათვალისწინებით, ეს, შესაძლოა, მოსახერხებელი არ იყოს, თუმცა შეგვიძლია სხვანაირადაც შევხედოთ: სკოლის ასაკის ბავშვებს ინგლისურენოვანი სუბტიტრებიანი ფილმების ნახვა ენის სწავლაში დაეხმარება.

ასე, რომ თუ აქამდე ნეტფლიქსის პაკეტის ყიდვისგან იმის გამო იკავებდით თავს, რომ უსარგებლო, ან ძალიან ძვირი გეგონათ, შეგიძლიათ, უფასო ერთთვიანი ვადით ისარგებლოთ და Bandersnatch-ში სიუჟეტის მართვის პარალელურად, ისიც გაიგოთ, შემთხვევით ნეტფლიქსის მომავალი მომხმარებელი ხომ არ ხართ.