შინაგან საქმეთა სამინისტროს ინფორმაციით, ქუთაისში სავალუტო ჯიხურის დაყაჩაღების ბრალდებით ერთი პირი დააკავეს. უწყებაში ამბობენ, რომ ბრალდებული სავალუტო ჯიხურს ცეცხსასროლი იარაღით თავს დაესხა და თანხას ითხოვდა. მათი თქმით, ყაჩაღობას დაცვის პოლიციის ინკაცსაციის თანამშრომლები შეესწრენ და ფაქტი აღკვეთეს.

უწყების განცხადებით, დაკავებული ამჟამად ნარკოდანაშაულისთვის პირობითი მსჯავრის ქვეშ მყოფი პირია. მათი თქმით, სამართალდამცველებმა დანაშაულის ჩადენის იარაღი: ავტომატი და პისტოლეტი შემთხვევის ადგილიდან ნივთმტკიცებად ამოიღეს.

საქმეზე გამოძიება ყაჩაღობის და ცეცხლსასროლი იარაღის მართლსაწინააღმდეგო შეძენა-შენახვა-ტარების ფაქტზე, საქართველოს სისხლის სამართლის კოდექსის 179-ე და 236-ე მუხლებით მიმდინარეობს. დანაშაული 6-დან 9 წლამდე ვადით თავისუფლების აღკვეთს ითვალისწინებს.