შინაგან საქმეთა სამინისტროს ინფორმაციით, გორში მდგმურმა 74 წლის ქალი მოკლა შემდეგ კი გაქურდა და ნივთები ლომბარდში ჩააბარა. უწყების განცხადებით, დაკავებულია 50 წლის ქალი, რომელიც დანაშაულს აღიარებს.

უწყებაში ამბობენ, რომ ბრალდებულმა ბინის პატრონთან სტუმრობის დროს ოქროს ნივთის მოპარვა დააპირა, რასაც სიტყვიერი და ფიზიკური დაპირისპირება მოყვა და მან მეპატრონეს ბოთლი თავის არეში რამდენჯერმე ჩაარტყა. 74 წლის ქალი ადგილზე, საკუთარ საცხოვრებელ ბინაში გარდაიცვალა.

შსს-ს ინფორმაციით, ბრალდებულმა შემთხვევის ადგილის დატოვებამდე გარდაცვლილის კუთვნილი ოქროს საყურე მოიპარა, რომელიც მოგვიანებით, რუსთავში მდებარე ერთ-ერთ ლომბარდში ჩააბარა. უწყებაში ამბობენ, რომ პოლიციამ ლომბარდში ჩაბარებული ნივთი ნივთმტკიცებად ამოიღო.

სამქეზე გამოძიება განხრახ მკვლელობის ფაქტზე, საქართველოს სსკ-ს 108-ე მუხლით მიმდინარეობს. დანაშაული ისჯება თავისუფლების აღკვეთით ვადით შვიდიდან თხუთმეტ წლამდე, იარაღთან დაკავშირებული უფლებების შეზღუდვით ან უამისოდ.