გონიოში, სამხედრო წვრთნებისას დაკარგულ სპეცრაზმელებთან დაკავშირებით მიმდინარე გამოძიების დეტალები ახლო მომავალში გახდება ცნობილი. განცხადება ამის შესახებ თავდაცვის მინისტრმა, ლევან იზორიამ გააკეთა. მისი თქმით, გამოძიების შედეგად გამოიკვეთა დანაშაულის ნიშნები:

"გამოძიებას უკვე აქვს კონკრეტული შედეგები. იკვეთება გარკვეული დანაშაულის ნიშნები. თუ რა ტიპის დანაშაულთან გვაქვს საქმე, მალე საზოგადოება მიიღებს ამაზე ინფორმაციას".

გამოძიებას მთავარი პროკურატურა აწარმოებს.

20 აგვისტოს თურქული ხომალდი სამძებრო სამუშაოებში ჩაერთო, თუმცა თავდაცვის სამინისტროს განცხადებით, 11 დღიანი სამუშაოების შემდეგ თურქულმა მხარემ ძებნის ოპერაციის შეჩერების გადაწყვეტილება მიიღო.

"თურქული მხარის განმარტებით, ძებნის ოპერაციის გაგრძელება ამ ეტაპზე შედეგს ვეღარ გამოიღებს, რადგან მათი მხრიდან ყველანაირი რესურსი იქნა გამოყენებული, იმ რთული გარემო პირობების გათვალისწინებით, რომელშიც მათ უწევდათ მუშაობა."

რუსთავი 2-ის ინფორმაციით, ერთ-ერთი დაკარგულის დედა უვადო შიმშილობას იწყებს. მისი მოთხოვნა ძებნის გაგრძელება და ცხედრის პოვნაა:

"მე იაგო შარაძის დედა, დღეს უვადო შიმშილობას ვაცხადებ, სანამ შვილის ცხედარს არ ჩამაბარებენ."

16 აგვისტოს გონიოს ყოფილი სასროლეთის ტერიტორიაზე, შავ ზღვაში მიმდინარე წვრთნის დროს, ორი სამხედრო მოსამსახურე - კაპრალი იაგო შარაძე და I კლასის რიგითი გიორგი ნანეტაშვილი დაიკარგნენ.