ოფიციალურად, ჯერ კიდევ იურიდიულ საკითხთა კომიტეტის თავმჯდომარე ეკა ბესელიამ პირველი მოადგილის თანამდებობაზე გედევან ფოფხაძე დაასახელა. მიუხედავად იმისა, რომ ბესელიამ თანამდებობის დატოვების შესახებ ბრიფინგზე ისაუბრა, მას გადადგომის ოფიციალური განცხადება ჯერ არ დაუწერია.

გედევან ფოფხაძის კანდიდატურის დასახელებას უმრავლესობის დეპუტატია ანრი ოხანაშვილის მხრიდან კითხვები მოჰყვა. დეპუტატმა ბესეილიას ჰკითხა იყო თუ არა ეს გადაწყვეტილება შეთანხმებული გუნდის ხელმძღვანელობასთან.

ოხანაშვილის პასუხად ბესელიამ განაცხადა, რომ რეგლამენტში არსად წერია, რომ მსგავსი ინიციატივა პარლამენტის კომიტეტმა გუნდის ხელმძღვანელობასთან უნდა შეათანხმოს. მისი თქმით, ყველაფერი რეგლამენტის დაცვით ხდება.

დღეს, 27 დეკემბერს იურიდიულ საკითხთა კომიტეტის თავმჯდომარე, ეკა ბესელია გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი