ქალთა მოძრაობა აცხადებს, რომ ქალებს, რომლებსაც საქართველოს ეკონომიკის მინისტრის, გიორგი ქობულიას თქმით, "მუშაობა არ უნდათ", კაცებთან შედარებით სამჯერ მეტი დრო ეხარჯებათ არაანაზღაურებად საოჯახო საქმიანობაზე. მინისტრს ქალთა მოძრაობა განცხადებით პასუხობს ქალთა ეკონომიკური გაძლიერების სტრატეგიის შემუშავებისკენ მოუწოდებს.

"ფაქტია, რომ საქართველოში ქალების დიდი ნაწილი ანაზღაურებად შრომაში არ არის ჩაბმული, მაგრამ ამ რეალობის მიზეზი, ცხადია, სიზარმაცე არ გახლავთ; მიზეზები იმაზე მეტად კომპლექსური და მძიმეა, ვიდრე ეს ღატაკი ქვეყნის მინისტრს წარმოუდგენია", — აღნიშნულია განცხადებაში.

ქალთა მოძრაობის ინფორმაციით, საშუალოდ, ქალები საქართველოში კვირაში 45 საათს ხარჯავენ საოჯახო შრომაზე, რაც სრული განაკვეთით შრომის საათებს აღემატება. დასაქმებული ქალები, საშუალოდ, 42 საათს უთმობენ საოჯახო შრომას, რაც მათ ორმაგ შორმას გულისხმობს.

მოძრაობა მინისტრს ქალთა მიმართ ქმრების მიერ ეკონომიკურ ძალადობაზე, მუშაობის უფლების შეზღუდვასა და ქალთა მიმართ მტრულ და დისკრიმინაციულ სამუშაო გარემოზე მიუთითებენ.

"დაბალხელფასიანი სამსახურების შემთხვევაში ქალებს ორმაგ, სრულგანაკვეთიან პირობებში უწევთ ცხოვრება და მუშაობა. ამ რეალობის ფონზე, როდესაც ეკონომიკის მინისტრი ეკონომიკურად არააქტიური ქალების საშინაო საქმეში გამოკეტვას პერსონალურ პასუხისმგებლობად და უფრო მეტიც, სიზარმაცედ განიხილავს, სხვა არაფერია, თუ არა სახელმწიფოს უცოდინრობა და ხედვის არქონა ქალთა ეკონომიკური გაძლიერების კუთხით", — აღნიშნულია განცხადებაში.