თბილისის მერს, კახა კალაძეს მიაჩნია, რომ მომავალში ტაქსით მგზავრობის საფასური საქართველოში უნდა გაიზარდოს. კალაძეს ამის მაგალითად სხვა ქვეყნები მოჰყავს და ამბობს, რომ სხვაგან გაცილებით ძვირია ტაქსის საფასური, საქართველოში კი, იაფია. ამის შესახებ თბილისის მერმა პალიტრანიუსის ეთერში, გადაცემაში 360 გრადუსი განაცხადა:

"ჩვენ არ ვზღუდავთ ტაქსებს, პირიქით, ხელს ვუწყობთ, რომ სწორად განვითარდნენ ისინი. ეს ხელისშეწყობა გამოიხატება ზუსტად იმ ბენეფიტებში, რაზეც ვსაუბრობდი. რა თქმა უნდა, მომავალში ტაქსით მომსახურების საფასურიც უნდა გაიზარდოს. სხვა ქვეყნებს თუ შევადარებთ, დღეს საქართველოში ძალიან იაფია ტაქსით მგზავრობა".

თბილისის მერმა გადაცემაში ტაქსების რეფორმის მეორე ეტაპზეც ისაუბრა. მისი თქმით, პირველი იანვრიდან შემოდის სავალდებულო ტექდათვალიერება და თუკი მანქანას ის არ აქვს გავლილი, ისე ტაქსის ლიცენზიას ვერ მიიღებს. კალაძემ აღნიშნა ისიც, რომ ტაქსის მძღოლები გათავისუფლებული იქნებიან საშემოსავლო გადასახადისგან.

თბილისის მერიის ახალი რეგულაციით, 2019 წლის პირველი ოქტომბრიდან ქალაქში თეთრი ფერის ტაქსები იმოძრავებენ. მიმდინარე წლის პირველი ოქტომბრიდან უკვე აიკრძალა ულიცენზიო ტაქსის მოძრაობა. გარდა ამისა, ტაქსის მომსახურებას ვეღარ გაუწევენ სამკარიანია და მარჯვენასაჭიანი ავტომობილები.

გაიგეთ მეტი: თეთრად შეღებვა და სალონის ქიმწმენდა — რა შემთხვევაში მისცემს მერია ტაქსებს ვაუჩერს