შინაგან საქმეთა სამინისტროში ხორავას ქუჩის საქმის გამოძიების ფარგლებში არასრულწლოვნების დაკითხვა გრძელდება. დღეს, 22 დეკემბრის დილიდან რამდენიმე მოზარდი სამინისტროში ოჯახის წევრებთან ერთად მივიდა. გამოკითხვის დეტალები უცნობია. შინაგან საქმეთა სამინისტროში On.ge-ს განუცხადეს, რომ გრძელდება საგამოძიებო მოქმედებები ხორავას ქუჩის საქმიდან გამოყოფილ საქმეზე და ამის ფარგლებში, დღეს მოწმეები გამოიკითხნენ.

გუშინ, 21 დეკემბერს შს მინისტრმა გიორგი გახარიამ პარლამენტში სიტყვით გამოსვლისას ხორავას ქუჩის საქმის მოწმის, მიხეილ კალანდიას ეპიზოდზე თქვა, რომ მიმდინარეობს ამ პირის "ფუნქციის დეტალური შესწავლა", თუმცა მის მიმართ დევნის დასაწყებად "შესაბამისი სტანდარტი არ არსებობს".

ხორავას ქუჩაზე მომხდარი მკვლელობიდან 1 წელი გავიდა. ამ დრომდე დაუდგენელია თუ ვინ მოკლა არასრულწლოვანი დავით სარალიძე. შვილმოკლული მამა მთელი წელია მკვლელების დასჯას და სამართლიანი გამოძიების წარმოებას ითხოვს.

გაიგეთ მეტი: 1 წელი ხორავას ქუჩის ტრაგედიიდან — მოკლედ