"არავითარ შემთხვევაში არ შეიძლება პოლიციელების შეურაცხყოფა, სხვადასხვა ფორმით, გახდეს ყოველდღიურობა და ამის ტენდენცია გამოიკვეთა ამ ბოლო პერიოდში", — ასე უპასუხა საქართველოს პარლამენტის თავმჯდომარემ, ოპოზიციის მხარდამჭერთა დაკავების შესახებ დასმულ კითხვას.

ირაკლი კობახიძე ამბობს, რომ საჭირო იყო პასუხი და ეს პასუხი კანონის ფარგლებში გასცა შსს-მ.

"დაუშვებელია უარყოფითი ტენდენციებისთვის გზის მიცემა. ეს არ იქნებოდა სწორი. აქედან გამომდინარე, საჭირო იყო ხელისუფლების მხრიდან პასუხი", — განაცხადა პარლამენტის თავმჯდომარემ.

ირაკლი კობახიძემ კიდევ ერთხელ აღნიშნა, რომ 16 დეკემბერს ოპოზიციას ალტერნატიული გზა შესთავაზეს, თუმცა, მისივე შეფასებით, მათი თვითმიზანი პროვოკაციის მოწყობა იყო.

საქართველოს შინაგან საქმეთა სამინისტრომ, ველისციხესთან პოლიციელებზე ძალადობის ბრალდებით დააკავა ნაციონალური მოძრაობის დეპუტატი, დავით კირკიტაძე. მოგვიანებით შსს-მ კიდევ ერთი პირი პოლიციელის მანქანის დაზიანების ბრალდებით დააკავა. შს მინისტრმა გიორგი გახარიამ განაცხადა, რომ დანაშაულის ნიშნების გამოკვეთის შემთხვევაში ყველა დაისჯება, იქნება ეს პოლიციელი თუ დეპუტატი.