საქართველოს პრეზიდენტის, სალომე ზურაბიშვილის საპრეზიდენტო მდივნის, დიმიტრი გაბუნიას განცხადებით, პრეზიდენტი ცესკოს თავმჯდომარეობის სამ კანდიდატს არასამთავრობო სექტორთან კონსულტაციების შემდეგ წარადგენს. სალომე ზურაბიშვილს თავმჯდომარეობის კანდიდატების წარსადგენად ვადა ხვალამდე, 21 დეკემბრამდე აქვს.

დიმიტრი გაბუნიას განცხადებით, გავრცელებულ ინფორმაციაზე, რომ ერთ-ერთი კანდიდატი კვლავ თამარ ჟვანია იქნება, ინფორმაცია არ ფლობს. მისივე თქმით, ყველა დეტალი ხვალ გაცხადდება.

"მე ამის თაობაზე პასუხს ვერ გაგცემთ. სალომე ზურაბიშვილმა უნდა მიიღოს გადაწყვეტილება. თუ პირადად მე მეკითხებით, თამარ ჟვანიასთან დაკავშირებით პრეტენზია არ მაქვს", — განაცხადა დიმიტრი გაბუნიამ.

კითხვაზე, რატომ არ დაიწყო პრეზიდენტმა კონსულტაციები ამ დრომდე, დიმიტრი გაბუნია პასუხობს, რომ კანონში არაა მითითებული კონკრეტულად რომელ დღეს უნდა იმსჯელოს პრეზიდენტმა.

"არ გვაქვს დადგენილი, რომ ორშაბათს ან სამშაბათს უნდა გავიაროთ კონსულტაციები. უნდა გავიაროთ კონსულტაციები კანონით დადგენილ ვადაში. ერთი დღე კონსულტაციებისთვის საკმარისია", — განაცხადა დიმიტრი გაბუნიამ.