ფეისბუქმა სპოტიფაისა და ნეტფლიქსს წვდომა მისცა იმ მომხმარებლების პირად მესიჯებზე, რომლებსაც აღნიშნულ სერვისებზე საკუთარი ანგარიში აქვთ მიბმული. ინფორმაციას New York Times-ის მორიგ კრიტიკულ სტატიაში ვეცნობით.

გამოცემის მიხედვით, სპოტიფაისა და ნეტფლიქსს შეეძლოთ "წაეკითხათ, დაეწერათ და წაეშალათ მომხმარებლების პირადი მესიჯები და ასევე ენახათ მიმოწერაში მყოფი პირები".

ფეისბუქის განცხადებით, მის პარტნიორებს აღნიშნული პრივილეგია ბოროტად არასდროს გამოუყენებიათ. სპოტიფაი და ნეტფლიქსი კი აცხადებენ, რომ მათთვის უცნობი იყო, რომ ფეისბუქი ამ ძალაუფლებას უზიარებდა.

სპოტიფაი ჯერ კიდევ იყენებს სიმღერის მესენჯერში გაზიარების ფუნქციას და სოციალური ქსელის 70 მილიონზე მეტი მომხმარებლის მესიჯებზე აქვს წვდომა. ნეტფლიქსმა კი თავის ტვიტერზე დაწერა:

"ნეტფლიქსს არასდროს დასჭირვებია და არც გამოუყენებია პირად მიმოწერაზე წვდომა. ჩვენ იმ ტიპის ბიზნესი არ ვართ, რომ ინბოქსში შემოგიძვრეთ".

ნიუ-იორკ თაიმსმა ფეისბუქის დოკუმენტების ასობით გვერდი შეისწავლა. გამოცემამ ინტერვიუ აიღო 60-ზე მეტი ადამიანისგან, ზოგი მათგანი ფეისბუქის ყოფილი თანამშრომელი, ზოგი კი კომპანიის ყოფილი პარტნიორი იყო.

ამავე თემაზე: