ფეისბუქის პროგრამული ხარვეზის გამო 6,8 მილიონი ადამიანის ფოტოები გარეშე აპლიკაციებისთვის ხელმისაწვდომი გახდა. BBC-ის ცნობით, ამ აპლიკაციების რაოდენობა 1500-ს აღწევს.

როგორც წესი, იმ აპლიკაციებს, რომლებსაც ფეისბუქთან აქვთ კავშირი, მხოლოდ მომხმარებლის კედელზე გამოქვეყნებულ ფოტოებზე შეუძლიათ წვდომა, თუმცა, 2018 წლის 12 სექტემბრიდან 25 სექტემბრამდე დეველოპერებისთვის ღია გახდა მომხმარებლების სთორიში ატვირთული და დრაფტში შენახული ფოტოებიც. ამის შესახებ კომპანიამ დეველოპერებისთვის განკუთვნილ ბლოგზე დაწერა.

Facebook-მა ბოდიში მოიხადა მომხდარის გამო და განაცხადა, რომ თითოეულ მომხმარებელს, რომლის პირადი ინფორმაციაც გაუფრთხილებლად გავრცელდა, შეტყობინება მიუვა. კომპანია ასევე აპირებს, "დეველოპერებს ფოტოების წაშლაში დაეხმაროს".

ეს ფეისბუქის პირველი სკანდალი არაა მომხმარებლების ინფორმაციის უსაფრთხოებასთან დაკავშირებით. რამდენიმე თვის წინ კემბრიჯ ანალიტიკა ფეისბუქის მეშვეობით მილიონობით მომხმარებლის პირადი მონაცემების მოპოვებასა და შემდგომ პოლიტიკური მიზნებისთვის გამოყენებაში დაადანაშაულეს.

გაიგეთ მეტი: