გაერთიანებული ოპოზიცია და მისი მხარდამჭერები საპროტესტო აქციას მართავენ გმირთა მემორილთან, სადაც რამდენიმე საათის წინ არჩეული პრეზიდენტი, სალომე ზურაბიშვილი იყო მისული.

აქციის მონაწილეები გმირთა მემორიალთან ზურაბიშვილის მისვლას აპროტესტებენ. ისინი ამბობენ, რომ სალომე ზურაბიშვილი მემორიალთან ისე "მიიპარა, როგორც ბიძინა ივანიშვილმა მოიპარა არჩევნები".

ინაუგურაციამდე ერთი დღით ადრე სალომე ზურაბიშვილი გმირთა მემორიალსა და მთაწმინდის პანთეონს ეწვია. აღნიშნულის შესახებ მედიისთვის ცნობილი არ იყო.

არჩეული პრეზიდენტის პრესსამსახურის მიერ გავრცელებული კადრებიდან ჩანს, რომ ზურაბიშვილმა გმირთა მემორიალი გვირგვინით შეამკო და საზეიმო ღონისძიება გაიმართა. მთაწმინდის პანთეონში კი მან ილია ჭავჭავაძის საფლავთან სანთელი დაანთო.

პანთეონში ილია ჭავჭავაძის საფლავზე ასვლა მეორე პრეზიდენტის ედუარდ შევარდნაძის იდეა იყო. შევარდნაძემ საპრეზიდენტო ბრძანებულება გამოსცა, რომლის საფუძველზეც ინაუგურაციის დღეს პანთეონში ასვლა და ილია ჭავჭავაძის საფლავის გვირგვინით შემკობა პროტოკოლის ნაწილად იქცა.

რამდენიმე დღის წინ ვრცელდებოდა ინფორმაცია, რომ ინაუგურაციის დღეს ღონისძიებები გაიმართებოდა თბილისში, თელავსა და წინანდალში, თუმცა გუშინ ცნობილი გახდა, რომ თბილისის ღონისძიებები ინაუგურაციის დღის განრიგიდან ამოიღეს. ამავე დღეს ცნობილი გახდა, რომ ინაუგურაციის წესში ცვლილება შევიდნენ.

ამასთან დაკავშირებით On.ge ცდილობს არჩეული პრეზიდენტის პრესსამსახურს დაუკავშირდეს, თუმცა ისინი ჩვენს ზარებსა და შეტყობინებებს არ პასუხობენ.

საქართველოს მეხუთე პრეზიდენტის ინაუგურაცია 16 ოქტომბერს თელავში გაიმართება. ინაუგურაციის პარალელურად გაერთიანებული ოპოზიცია და მათი მხარდამჭერები საპროტესტო აქციას გამართავენ. თელავის გარდა აქციები გაიმართება თბილისში, ზუგდიდში, ბათუმსა და ქუთაისში.