საქართველოს მომავალი პრეზიდენტის სალომე ზურაბიშვილის თქმით, ის ელოდება, რომ რუსეთისგან საქართველოსა და ოკუპირებული ტერიტორიების მიმართ მტრული დამოკიდებულება შეიცვალოს. ასე უპასუხა სალომე ზურაბიშვილმა რუსეთის საგარეო საქმეთა მინისტრის მოადგილის გრიგორი კარასინის განცხადებას, რომლის მიხედვითაც "არჩევნებმა ვერ მოახდინა გავლენა საქართველოს დამოკიდებულებაზე აფხაზეთისა და სამხრეთ ოსეთის მიმართ".

"ჯერ ერთი, მე მგონი კარასინი არ უნდა იყოს პოლიტიკური პირი, რომელიც პოლიტიკურ განცხადებებს აკეთებს. მეორე, მე, როგორც საქართველოს მომავალი პრეზიდენტი ველოდები, რომ შეიცვალოს რუსეთისგან მტრული დამოკიდებულება საქართველოს მიმართ და ოკუპირებული ტერიტორიების მიმართ", — განუცხადა სალომე ზურაბიშვილმა ჟურნალისტებს.

მისივე თქმით, ის ვალდებული არ არის გრიგორი კარასინის ყველა განცხადებას უპასუხოს.

"გიპასუხეთ, რომ ის არ არის პოლიტიკური პირი. მაგრამ, ამავდროულად ჩვენ ველოდებით, რომ დადებითად შეიცვალოს რუსეთის დამოკიდებულება ყველა იმ საკითხის მიმართ, რომელიც ჩვენ გვაღელვებს", — განაცხადა ზურაბიშვილმა.

რუსეთის საგარეო საქმეთა მინისტრის მოადგილემ, გრიგორი კარასინმა რია ნოვოსტთან მიცემულ ინტერვიუში თქვა, რომ არჩევნების შემდეგ თბილისის მტრული რიტორიკის შეცვლის იმედი ჰქონდა.