TI-ის ინფორმაციით, გამოკითხული 7 პარტიიდან საქართველოს ნატოში გაწევრიანების ცალსახა მომხრე მხოლოდ 5-ია, დემოკრატიული მოძრაობა ამის წინააღმდეგია, ხოლო მრეწველები განმარტავენ, რომ იდეას მხოლოდ იმ შემთხვევაში დაუჭერენ მხარს, თუ რუსეთთან ურთიერთობა მკვეთრად არ გაუარესდება.

ნატოში გაწევრიანების ცალსახა მომხრეებს შორის არიან:

  • ენმ,
  • რესპუბლიკელები,
  • გირჩი,
  • თავისუფალი დემოკრატები,
  • ეროვნული ფორუმი.

ინფორმაცია პოლიტიკური პარტიების შეხედულებების შესახებ TI-ის ახალი ვებსაიტის, ChemiKhma.ge-ს გამოკითხვის შედეგების მეშვეობით გახდა ცნობილი.

საერთაშორისო გამჭვირვალობა - საქართველომ ვებსაიტის პრეზენტაცია დღეს წარადგინა. საიტზე შესული მომხმარებელი კითხვარს ავსებს, შემდეგ კი თავის პასუხებს სხვადასხვა პოლიტიკური პარტიების მიერ გაცემულ შესაბამის პასუხებს ადარებს, რომლებიც, თავის მხრივ, მათი საარჩევნო პროგრამების მიხედვითაა შევსებული.

კითხვები კატეგორიებად არის დაყოფილი, რომელშიც შედის სოციალურ-ეკონომიკური, გარემოსდაცვითი, საშინაო, ჯანდაცვის, საგარეო პოლიტიკისა და განათლების საკითხები.

აღსანიშნავია, რომ TI-ის თხოვნის შესაბამისად, კითხვარი მხოლოდ 7-მა პარტიამ შეავსო. რაც შეეხება მოძრაობას პაატა ბურჭულაძე - სახელმწიფო ხალხისთვის, საქარველოს კონსერვატიული პარტიას, ლეიბორისტულ პარტიასა და პატრიოტთა ალიანსს, მათ კითხვარის შევსებისგან, სხვადასხვა მიზეზის გამო, თავი შეიკავეს.

კითხვარის შევსებაზე უარი ქართულმა ოცნებამაც თქვა.