პირი, რომელიც არასრულწლოვანს პიროტექნიკას მიჰყიდის, დაჯარიმდება. შესაბამის კანონპროექტს პარლამენტში დაჩქარებული წესით განიხილავენ.

უმრავლესობის დეპუტატების ინიციატივით, პიროტექნიკის არასრულწლოვანისათვის მიყიდვის გამო ფიზიკური პირი 100 ლარით დაჯარიმდება, ხოლო იურიდიული პირი — 200-ით. იგივე ქმედების ერთი წლის განმავლობაში განმეორებით ჩადენა კი დადგენილ ჯარიმებს 100 ლარით გაზრდის.

კანონპროექტის განმარტებით ბარათში ვკითხულობთ, რომ შესაბამის საქმეებს მუნიციპალიტეტის აღმასრულებელი ორგანოს შესაბამისი სამსახური ან მის მიერ უფლებამოსილი პირი განიხილავს.

ინიციატივის ავტორების თქმით, საქართველოში არასრულწლოვნებს პიროტექნიკაზე ხელი თავისუფლად მიუწვდებათ, რაც საფრთხის შემცველია მათი ჯანმრთელობისა და უსაფრთხოებისათვის.

2018 წლის იანვარში თბილისში პიროტექნიკით გამოწვეული ტრავმული დაზიანებებით ჰოსპიტალიზებული იყო 44 ადამიანი, მათ შორის 24 არასრულწლოვანი. 2017 წელის დასაწყისშიც პიროტექნიკის გამოყენების შედეგად 54 ადამიანი დაშავდა.

საერთაშორისო პრაქტიკა

საერთაშორისო გამოცდილებით, პიროტექნიკური საშუალებები იყოფა ფეიერვერკებად, თეატრალურ/სასცენო პიროტექნიკურ და პიროტექნიკურ საშუალებებად, რომელიც არ მიეკუთვნება ფეიერვერკს ან თეატრალურ/სასცენო პიროტექნიკას.

სხვადასხვა ქვეყნის რეგულაციები აწესრიგებს ისეთ საკითხებს, როგორიცაა პიროტექნიკის პროდუქციის ბაზარზე ხელმისაწვდომობა, მწარმოებლის, იმპორტიორის, დისტრიბუტორის უფლება-მოვალეობები, მარკირება, შეფასება და ა.შ.

მაგალითად, დიდ ბრიტანეთში პიროტექნიკის18 წლამდე პირებისთვის მიყიდვა იკრძალება. პიროტექნიკური ნაწარმის გაყიდვის, ფლობისა და გამოყენების წესის დარღვევა ისჯება კანონით, ჯარიმა შეადგენს 5000-მდე ბრიტანულ გირვანქა სტერლინგს, ან თავისუფლების აღკვეთას 6 თვის ვადით.

ამერიკის შეერთებულ შტატებში 18 წლამდე პირთათვის სამომხმარებლო ფეიერვერკის მიყიდვა ან გაცემა აკრძალულია ფედერალური კანონით, გარდა იმ შემთხვევისა, როდესაც არასრულწლოვანი დასაქმებულია სამომხმარებლო პიროტექნიკის რეალიზაციის ობიექტზე და მას ზედამხედველობას უწევს ობიექტის სრულწლოვანი თანამშრომელი.

ქართული კანონმდებლობა

საქართველოში პიროტექნიკასთან დაკავშირებულ შეზღუდვებს ადმინისტრაციული სამართალდარღვევათა კოდექსი არეგულირებს. ადმინისტრაციული პასუხისმგებლობაა ღამის საათებში პიროტექნიკური ნაკეთობის გამოყენებაზე. სისხლის სამართლის კოდექსის კი ითვალისწინებს პასუხისმგებლობას ფეთქებადი, ადვილად აალებადი, მწვავე ნივთიერების ან პიროტექნიკური ნაკეთობის აღრიცხვის, შენახვის, გადაზიდვის, გამოყენების ან გადაგზავნის წესების დარღვევისათვის.

2015 წლის 23 ივლისის საქართველოს მთავრობის დადგენილებით დამტკიცდა სახანძრო უსაფრთხოების წესებისა და პირობების შესახებ ტექნიკური რეგლამენტი. აღნიშნული რეგლამენტით განსაზღვრულია პიროტექნიკური ნაკეთობების შენახვის, გამოყენებისა და რეალიზაციის წესები.

საქართველოს პარლამენტმა 2018 წლის 27 ივნისს მიიღო კანონი საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ რომელიც აწესებს ადმინისტრაციულ პასუხისმგებლობას სახანძრო უსაფრთხოების წესებისა და პირობების შესახებ ტექნიკური რეგლამენტის მოთხოვნების დარღვევის ან შეუსრულებლობისათვის.