თიბისი კაპიტალმა FMCG სექტორის საინვესტიციო ანალიზი წარადგინა. კვლევის პრეზენტაცია King David-ის ბიზნეს კომპლექსში გაიმართა, რომელსაც მოწვეული სტუმრები, ბიზნესმენები, თიბისის დამფუძნებლები და კვლევის ავტორები ესწრებოდნენ.

თიბისი კაპიტალის მერ მომზადებული კვლევა, კვებისა და სწრაფი მოხმარების პროდუქციის სექტორის შესახებ, პირველი საინვესტიციო ანალიზია ამ სექტორისთვის. კვლევის მომზადება ბაზრის მონაწილე კომპანიებისა და ინვესტორების მზარდმა მოთხოვნამ განაპირობა, რომ მიიღონ რელევანტური, სანდო და კომპეტენტური ინფორმაცია სექტორის შესახებ. შესაბამისად, კვლევის მიზანია კომპანიებსა და პოტენციურ ინვესტორებს დაანახოს ბაზრის მიმდინარე მდგომარეობა და სექტორის განვითარების პოტენციალი.

"ამ სექტორში მომუშავე კომპანიების დიდი ნაწილისთვის თიბისი ბანკი ძირითადი პარტნიორი ბანკია, შესაბამისად, ბანკისთვის აღნიშნული სექტორი პრიორიტეტული მიმართულებაა. ამიტომაც, თიბისი მუდმივად სთავაზობს სექტორის მონაწილეებს, როგორც მათ მოთხოვნებზე მორგებულ საბანკო პროდუქტებს, ასევე საინვესტიციო საბანკო მომსახურეობას", - განაცხადა თიბისი ბანკის გენერალური დირექტორის მოადგილემ გიორგი თხელიძემ.

ორგანიზებულ საცალო ვაჭრობას, ანუ ბრენდირებულ ქსელურ სავაჭრო ობიექტებს, საქართველოში განვითარების დიდი პოტენციალი აქვს. 2017 წლის მდგომარეობით აღნიშნული სექტორის ზომა 7.8 მილიარდი ლარის მოცულობის იყო, საიდანაც მხოლოდ 16% ეკავა ორგანიზებული ბაზრის მოთამაშეებს.

"ჩვენს მიერ ჩატარებული კვლევა გვაძლევს საკმარის საფუძველს, რომ განვსაზღვროთ სექტორის ზრდის პოტენციალი. ჩვენი პროგნოზით, სექტორი გაიზრდება 11 მილიარდ ლარამდე შემდეგი ექვსი წლის მანძილზე, ხოლო ორგანიზებული ბაზრის წილი თითქმის გაორმაგდება იგივე პეირიოდში", - განაცხადა თიბისი კაპიტალის კვლევისა და საბროკერო დეპარტამენტის უფროსმა, ნინო ცხადაიამ.

ღონისძიებას ესწრებოდა თიბისის გენერალური დირექტორი ვახტანგ ბუცხრიკიძე, რომელმაც მედიასთან საუბარში განმარტა, რომ აღნიშნული კვლევა კვებისა და სწრაფი მოხმარების პროდუქციის სექტორის განვითარებისთვის უმნიშვნელოვანესია.

"თიბისი თავის პარტნიორ კომპანიებს მაქსიმალურად ხელს უწყობს განვითარებაში და ეს კვლევაც ამის ერთ-ერთი გამოხატვაა. კომპანიებს საშუალება აქვთ დააკვირდნენ ტენდენციებს, გამოწვევებს და სამომავლო პერსპექტივებს, რომელიც მათი ოპერირების ბაზარზე არსებობს", - განაცხადა ვახტანგ ბუცხრიკიძემ.

თიბისი კაპიტალი თიბისი ბანკის შვილობილი და ლიცენზირებული საბროკერო კომპანიაა, რომელიც მომხმარებლებს სთავაზობს საინვესტიციო საბანკო მომსახურებას. 2017 წლიდან თიბისი კაპიტალი გახდა თიბისი ბანკის კორპორაციული და საინვესტიციო საბანკო ბიზნესის ნაწილი. კომპანიის ძირითადი ბიზნესმიმართულებებია: ფინანსური კონსულტაციები და საკრედიტო, სარეიტინგო მომსახურება, ობლიგაციებისა და აქციების ემისია, საინვესტიციო კვლევითი და საბროკერო საქმიანობა.