პრეზიდენტი გიორგი მარგველაშვილი არ ამბობს თუ რატომ ჩაიშალა შეწყალების კომისიის სხდომა. ამის შესახებ მან კავკასიის უნივერსიტეტში სტუდენტებთან შეხვედრის დროს განაცხადა. შეწყალების აქტთან დაკავშირებით კითხვა რუსთავი 2-ის ჟურნალისტმა დაუსვა.

"იმ პოლიტიკოსთა რიცხვს მივეკუთვნები, რომელიც ძალინ კარგად ახერხებს და ინახავს თავისი კაბინეტის ინფორმაციულ შეუვალობას და არ ვყვები ხოლმე რატომ გადავდგი ნაბიჯი თუ არ მინდა ხოლმე ამაზე საუბარი", — აღნიშნა მარგველაშვილმა.

შეწყალების კომისიის ბოლო სხდომა, გიორგი მარგველაშვილის პრეზიდენტობისას ამ კვირაში უნდა ჩატარებულიყო. ჯერ მხოლოდ ერთი მოსამზადებელი შეხვედრა გაიმართა, დანარჩენი კი გაურკვეველი მიზეზით გაუქმდა.

სახალხო დამცველი და შეწყალების კომისიის წევრი, ნინო ლომჯარია ამბობს, რომ კომისიის დაგეგმილი სხდომა პრეზიდენტის გადაწყვეტილებით ჩაიშალა. ის ვარაუდობს, რომ პრეზიდენტი შეწყალებას აღარ გეგმავს, და სწორედ ეს შეიძლება გამხდარიყო სხდომის გაუქმების მიზეზი.