სახალხო დამცველი და შეწყალების კომისიის წევრი, ნინო ლომჯარია ამბობს, რომ კომისიის დაგეგმილი სხდომა პრეზიდენტის გადაწყვეტილებით ჩაიშალა. ის ვარაუდობს, რომ პრეზიდენტი შეწყალებას აღარ გეგმავს, და სწორედ ეს შეიძლება გამხდარიყო სხდომის გაუქმების მიზეზი:

"ჩვენ მივიღეთ პასუხი, რომ ეს იყო პრეზიდენტის გადაწყვეტილებაზე დამოკიდებული. იქედან გამომდინარე, რომ არ ვიცით, შეიწყალებს თუ არა მსჯავრდებულებს და, სავარაუდოდ, აღარ, ალბათ, აღარ ჰქონდა აზრი კომისიის სხდომის ჩატარებას".

სხდომის გაუქმების მიზეზი არ იცის არც კომისიის თავმჯდომარემ, ზვიად ქორიძემ. მისი თქმით, ალბათობა იმისა, რომ პრეზიდენტმა ეს აქტი გამოსცეს, ისევეა, როგორც არ გამოსცეს:

"კომისიის სახდომა ჩანიშნა პრეზიდენტმა, შემდეგ შეაჩერა. თუ პრეზიდენტმა მარგველაშვილმა არ მიიღო შეწყალების აქტი, ის საქმეები, რომლებიც ამ წუთას არის პრეზიდენტის ადმინისტრაციაში, განიხილება უკვე შემდეგი კომისიის მიერ".

შეწყალების კომისიის ბოლო სხდომა, გიორგი მარგველაშვილის პრეზიდენტობისას ამ კვირაში უნდა ჩატარებულიყო. ჯერ მხოლოდ ერთი მოსამზადებელი შეხვედრა გაიმართა, დანარჩენი კი გაურკვეველი მიზეზით გაუქმდა.