იუსტიციის სახლთან მიმდინარე ქსენოფობიური შინაარსის აქციის ორგანიზატორები შსს-მ დაკითხვაზე დაიბარა. მათ შორის არიან, დიმიტრი ლორთქიფანიძე, კონსტანტინე მორგოშია და გურამ ფალავანდიშვილი.

აქცია ცოტა ხნის წინ განახლდა. მონაწილეებს შორისაა პატრიოტთა ალიანსის წევრი, პარლამენტის დეპუტატი ადა მარშანია. პოლიციას, შენობის შესასვლელთან კორდონი აქვს გაკეთებული, თუმცა მოქალაქეებს შეუძლიათ შესვლა და იუსტიციის სახლის სერვისებით სარგებლობა.

შინაგან საქმეთა სამინისტრო თბილისის იუსტიციის სახლთან საქართველოს მოქალაქეობის არმქონე პირებზე ძალადობის საქმეს ეთნიკური ნიშნით უფლებების შეზღუდვის მუხლით იძიებს.

საქმეზე გამოძიება სისხლის სამართლის კოდექსის 142-ე მუხლის პირველი ნაწილით დაიწყო. ამ მუხლით ადამიანთა თანასწორუფლებიანობის დარღვევა მათი მოქალაქეობის, წარმოშობის გამო ისჯება ჯარიმით ან გამასწორებელი სამუშაოთი ვადით ერთ წლამდე ან/და თავისუფლების აღკვეთით ვადით ორ წლამდე.

იუსტიციის სახლთან აქცია გუშინ, 10 დეკემბერს, დილის 9 საათიდან იმართებოდა. ქსენოფობიური განწყობების ჯგუფები, მათ შორის ქართული მარშის წევრები და პარლამენტის დეპუტატები პატრიოტთა ალიანსიდან საკონსტიტუციო სასამართლოს იმ გადაწყვეტილებას აპროტესტებდნენ, რომლითაც საქართველოს მოქალაქეობის არ მქონე პირებს სასოფლო-სამეურნეო დანიშნულების მიწის ყიდვა შეუძლიათ.