"არა, მადლიერი რას ნიშნავს? მადლიერება რაში უნდა გამოვხატო, ჩემი ინტერესი იყო ეს ყველაფერი? ეს იყო ჩვენი საერთო მიზნის ნაწილი", — ასე უპასუხა საქართველოს მოქმედმა პრეზიდენტმა, გიორგი მარგველაშვილმა რუსთავი 2-ის კითხვას იმის შესახებ, არის თუ არა ბიძინა ივანიშვილის მადლიერი პრეზიდენტად გახდომის გამო.

გიორგი მარგველაშვილი აცხადებს, რომ ქართული ოცნების თავმჯდომარესთან, ბიძინა ივანიშვილთან დაპირისპირება ჯერ კიდევ პრეზიდენტის სასახლის საკითხის განხილვამდე დაიწყო. მისი თქმით, არაერთხელ შესთავაზა თანამშრომლობა მმართველ პარტიას თუმცა უარი მიიღო.

"გინდათ ვითანამშრომლოთ, ვითანამშრომლოთ. მე არავის მტერი არა ვარ და არც არასდროს ვყოფილვარ. მაგრამ ახლა ახალგაზრდა პიონერებივით გინდათ ჩემი შეზღუდვა ეგ არ გამოგივათ", — მოქმედი პრეზიდენტის თქმით, მმართველ პარტიასთან ეს მიდგომა ჰქონდა.

2013 წლის მაისში გიორგი მარგველაშვილი ქართულმა ოცნებამ პრეზიდენტობის კანდიდატად დაასახელა. მარგველაშვილმა ხმების 62,18 პროცენტი მიიღო.

წინასაარჩევნო პერიოდში მარგველაშვილი ამბობდა, რომ პრეზიდენტის სასახლეში არ შევიდოდა. სასახლე იყო ის საკითხი, რომელსაც ქართული ოცნება ნაციონალური მოძრაობისა და ექსპრეზიდენტ მიხეილ სააკაშვილის საკრიტიკებლად იყენებდა.

გაპრეზიდენტების შემდეგ გიორგი მარგველაშვილმა უარი თქვა სასახლის დატოვებაზე. ამ და სხვა საკითხებზე მას უთანხმოება ჰქონდა მმართველ გუნდთან, რაც საბოლოოდ იმით დასრულდა, რომ ყოფილი თანამებრძოლები ერთმანეთს დაუპირისპირდნენ.