საქართველოს მოქმედი პრეზიდენტი, გიორგი მარგველაშვილი მისი სიძის, მინდია გოგოჭურის დაკავების ფაქტს გამოეხმაურა და განაცხადა, რომ ამ საკითხთან დაკავშირებით პოლიტიკური გარიგება არ ჰქონია.

"მინდა, რომ იცოდეს საზოგადოებამ, რომ არანაირი მცდელობა იმისა, რომ ვინმეს შანტაჟი მოეხდინა არ ყოფილა. არც არანაირი გარიგება არ არსებობს არცერთ პოლიტიკურ ჯგუფთან", — განაცხადა მარგველაშვილმა.

მინდა გოგოჭური იარაღის უკანონოდ შეძენა-შენახვისა და დანაშაული შეუტყობინებლობის ბრალდებით 6 დეკემბერს დააკავეს. ტელეკომპანია რუსთავი 2-მა წყაროზე დაყრდნობით განაცხადა, რომ პრეზიდენტის სიძეზე შინაგან საქმეთა სამინისტროში ინფორმაცია ჰქონდათ, თუმცა ის არჩევნების მეორე ტურამდე არ დააკავეს. ტელეკომპანია აცხადებს, რომ, სავარაუდოდ, სიძის თავისუფლებაზე პრეზიდენტ გიორგი მარგველაშვილს შინაგან საქმეთა სამინისტრო და პროკურატურა ევაჭრებოდა.

"წყაროს ცნობით, ისინი ითხოვდნენ, რომ პრეზიდენტს სალომე ზურაბიშვილი და ქართული ოცნება არ გაეკრიტიკებინა, სანაცვლოდ კი სისხლიან გარჩევების საქმეებს, სადაც მინდია გოგოჭური ფიგურირებდა, მსვლელობას არ მისცემდნენ", — აცხადებს რუსთავი 2.

პრეზიდენტის სიძე მედიის ყურადღების ცენტრში არაერთხელ მოხვდა. ის 2017 წლის იანვარსა და 2018 წლის ივლისში დაჭრეს.