საქართველოს პარლამენტის წევრი ერთიანი ნაციონალური მოძრაობიდან სალომე სამადაშვილი აღარ აპირებს მონაწილეობა მიიღოს იმ აქციებში, რომელზეც გრიგოლ ვაშაძე მიესალმებიან, როგორც პრეზიდენტს. მისი თქმით, ეს მხოლოდ აზიანებს ოპოზიციის ინტერესებს როგორც ქვეყნის შიგნით, ისე ქვეყნის გარეთ.

"საუბარმა არალეგიტიმურობაზე, სამოქალაქო დაუმორჩილებლობაზე, იმაზე, რომ ზურაბიშვილი არაა ქვეყნის პრეზიდენტი და ა.შ. გამოიწვია ის, რომ საერთაშორისო შეფასებები იყო ბევრად ნაკლებად კრიტიკული, ვიდრე შეიძლებოდა ყოფილიყო. შედეგად, ივანიშვილის ხელისუფლება ნაკლებად დაზიანდა, ვიდრე საჭირო იყო", — წერს სამადაშვილის ფეისბუქზე.

მისივე თქმით, ის ყველგან და ყოველთვის გააპროტესტებს მმართველი გუნდის მიერ მხარდაჭერილი კანდიდატის, სალომე ზურაბიშვილის გაპრეზიდენტებას.

საპრეზიდენტო არჩევნების მეორე ტურში დამარცხებული გრიგოლ ვაშაძე და გაერთიანებული ოპოზიცია საპრეზიდენტო არჩევნების მეორე ტურის შედეგებს არ აღიარებენ. მათი პოზიციით, არჩევნებზე გაყალბების უპრეცედენტო მაჩვენებელი დაფიქსირდა.

ოპოზიცია რიგგარეშე საპარლამენტო არჩევნების ჩატარებასა და საარჩევნო კოდექსში ცვლილებებს ითხოვს. ვაშაძემ მმართველ ძალას სამუშაო ჯგუფის შექმნისკენაც მოუწოდა, თუმცა ხელისუფლებამ მისი შეთავაზება არ მიიღო. ოპოზიციამ ხელისუფლებას ვადა 16 დეკემბრამდე, ანუ ინაუგურაციამდე მისცა. სწორედ ამ დღეს დააანონსეს მათ მორიგი აქციაც.