თბილისის სააპელაციო სასამართლომ ვალერი გელაშვილზე თავდასხმის საქმეზე ექს-პრეზიდენტის მიხეილ სააკაშვილის მიმართ გამამტყუნებელი განაჩენი ძალაში დატოვა. ამნისტიის შესახებ კანონისა და სასჯელის შთანთქმის პრინციპის გამოყენებით მიხეილ სააკაშვილს განესაზღვრა თავისუფლების აღკვეთა 6 წლის ვადით და 2 წლისა და 3 თვის ვადით ჩამოერთვა თანამდებობის დაკავების უფლება.

პროკურატურის განცხადებით, 2005 წლის 29 ივნისს, გაზეთ რეზონანსში გამოქვეყნდა საქართველოს პარლამენტის იმჟამინდელი წევრის ვალერი გელაშვილის სტატია სათაურით "ვალერი გელაშვილი თავის სახლს სააკაშვილს დაუთმობს". სტატიაში ვალერი გელაშვილი გამოთქვამდა უკმაყოფილებას მოქმედი პრეზიდენტის მიმართ იმასთან დაკავშირებით, რომ მას წაართვეს ქონება, რომლის ღირებულებასაც არ უნაზღაურებდნენ. ამავე სტატიაში მან შეურაცხმყოფელი ფორმით ისაუბრა საქართველოს ყოფილი პრეზიდენტის მიხეილ სააკაშვილის პირადი ცხოვრების შესახებ.

უწყების ინფორმაციით, სტატიის გამოქვეყნების შემდეგ, მიხეილ სააკაშვილმა ვალერი გელაშვილის სამაგალითოდ დასჯისთვის თავდაცვის იმჟამინდელ მინისტრს ირაკლი ოქრუაშვილს დაავალა, რომ გელაშვილს ფიზიკურად გასწორებოდა, რაზეც მან უარი მიიღო. ამის შემდეგ, კი სააკაშვილმა ეს დავალება შს იმჟამინდელ მინისტრს, ვანო მერაბიშვილს დაავალა.

როგორც პროკურატურის განცხადებაშია აღნიშნული, ივანე მერაბიშვილმა სპეციალური ოპერატიული დეპარტამენტის დირექტორის დახმარებით მიღებული დავალება შეასრულა.

მათივე თქმით, სოდ-ის თანამშრომლებმა თბილისში გააჩერეს ვალერი გელაშვილის მანქანა და თავს დაესხნენ გელაშვილს და მის თანხმლებ პირებს, სცემეს და გაიტაცეს მისი იარაღი, 10 ათასი დოლარი და 50 ათასი ლარის ღირებულების ბეჭედი. თავდასხმის შედეგად ვალერი გელაშვილმა მიიღო სხეულის მძიმე ხარისხის დაზიანება.

თბილისის საქალაქო სასამართლომ 2012 წლის 28 დეკემბერს მიხეილ სააკაშვილი დამნაშავედ სცნო უფლებამოსილების გადამეტებაში ძალადობითა და იარაღის გამოყენებით და ჯგუფურად ჯანმრთელობის განზრახ მძიმე დაზიანების ორგანიზებაში.

ვალერი გელაშვილზე განხორციელებული თავდასხმის საქმეზე სასამართლოს მიერ გამამტყუნებელი განაჩენი უკვე გამოტანილია შინაგან საქმეთა ყოფილი მინისტრის, ვანო მერაბიშვილის, სპეციალური ოპერატიული დეპარტამენტის ყოფილი დირექტორისა და ამავე დეპარტამენტის სამმართველოს ყოფილი უფროსის მიმართ.