თბილისის მერი, დავით ნარმანია ამბობს, რომ საკრებულოს ოპოზიციის მოთხოვნის შესაბამისად, საკრებულოს სხდომაზე მისვლას აპირებს. თუმცა, მისი თქმით, საკრებულოში მისვლამდე ის ექსპერტებსა და არასამთავრობო ორგანიზაციების წარმომადგენლებს შეხვდება და მათგან ქალაქის გამწვანების პოლიტიკის დოკუმენტთან დაკავშირებით მოსაზრებებს მოისმენს:

"საკრებულოს ხელმძღვანელობასთან გავდივართ კონსულტაციებს და შესაბამისად, ზუსტ თარიღსა და დროს ვაცნობებთ საზოგადოებას. ეს არ იქნება ძალიან შორს, შესაძლოა უახლოეს დღეებში მოხდეს. მე ჯერ კიდევ გუშინ განვაცხადე, რომ აუცილებლად მივალ თბილისის საკრებულოში და გავცემ ყველა კითხვას პასუხს, რაც იქნება დასმული".

მან ასევე აღნიშნა, რომ უახლოეს დღეებში საზოგადოებრივ ორგანიზაციებს და ექსპერტებს შეხვდება, გააცნობს მათ მერიის მოსაზრებებს და მათ წინადადებებსაც მიიღებს იმისთვის, რომ კიდევ უფრო მეტად გამკაცრდეს წესები:

"ამას წარვადგენთ საკრებულოში, დოკუმენტის სახით".

საკითხს გამოეხმაურა ქართული ოცნება - მრეწველების წევრი, გიორგი ტყემალაძეც და განმარტა, რომ დავით ნარმანიას საკრებულოში მისვლის თარიღი ამ დღეებში, კონსულტაციების შედეგად გაირკვევა:

"ამ დღეების განმავლობაში აქტიურად იქნება თბილისის მერიაში მერთან და მთავრობის წევრებთან და ასევე საკრებულოს აქტიური მონაწილეობით, შეხვედრები შემდგომ რეგულაციებთან დაკავშირებით, რათა არ იყოს მომავალში გარკვეული პრობლემები აღნიშნულ საკითხებთან დაკავშირებით".

საკრებულოს ოპოზიციის წევრი, ენმ-ს წარმომადგენელი, ირაკლი აბესაძე კი ამბობს, რომ ნარმანიას საკრებულოში მისვლა კანონის შესაბამისადაა სავალდებულო:

"გამწვანება არ არის გამონაკლისი სფერო, სადაც უპასუხისმგებლობა ხშირ შემთხვევაში კორუფციაც, თბილისის მერიის მხრიდან, იძლევა ძალიან მძიმე სავალალო შედეგებს მოქალაქეებისთვის. ამიტომ, დავით ნარმანიას საკრებულოში მოსვლა კანონის შესაბამისადაც არის სავალდებულო და აუცილებელი იმისთვის, რომ მოქალაქეები გაერკვნენ, აპირებს ის იყოს თუ არა ქალაქის ხელისუფლება და შეასრულოს მასზე დაკისრებული მოვალეობები თუ მუდმივად უნდა გაექცეს პასუხისმგებლობას და ხელი უნდა გაიშვიროს გარეშე პირებისკენ".

საკრებულოს ოპოზიცია თბილისის მერს, დავით ნარმანიას ხუთშაბათს, 25 აგვისტოს, საკრებულოს სხდომაზე იბარებს.

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს. სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.