როგორც პარტიზანული მებაღეობის ერთ-ერთმა წევრმა, მარიამ ბაქრაძემ On.ge-ს განუცხადა, მას შემდეგ, რაც ნატა ფერაძემ შიმშილობა დაიწყო, მან შეუძლოდ რამდენჯერმე იგრძნო თავი, რის შემდეგაც ის რესპუბლიკურ საავადმყოფოში გადაიყვანეს, მოგვიანებით კი სახლში გაწერეს. ბაქრაძის თქმით, სწორედ ამიტომ ფერაძემ შიმშილობა შეწყვიტა.

როგორც პარტიზანი მებაღე აცხადებს, შიმშილობას აგრძელებს მათი გუნდის წევრი, ელენე მალაშევსკი-ჯაყელი მანამ, სანამ პარტიზანი მებაღეების მოთხოვნები არ შესრულდება.

ნატა ფერაძემ უვადო შიმშილობა 17 აგვისტოს თბილისის მერიასთან დაიწყო. მისი მთავარი მოთხოვნა ეკოლოგიისა და გამწვანების სამსახურის თანამშრომლების გათავისუფლება და კვალიფიციური კადრების აყვანა, ასევე ქალაქში მიმდინარე ეკოპროცესების მკაცრი იურიდიული გამოძიებაა.

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს.

სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.