პოლიციის წინააღმდეგობის მიუხედავად, თბილისში, რუსთაველის გამზირზე, პარლამენტის შენობის წინ კარვები მაინც გაიშალა. სწორედ ამ ადგილზე უნდა თბილისის მერიას საახალწლო ნაძვის ხის დადგმა და შვილმკვდარ მამას, ზაზა სარალიძეს პროტესტისთვის სხვა ადგილზე გადასვლას ურჩევს.

კარვები რუსთაველის გამზირზე მისულმა არასამთავრობო ორგანიზაციების წარმომადგენლებმა გაშალეს. ისინი აღნიშნავენ, რომ კარვის გაშლა ადამიანის კონსტიტუციური უფლებაა.

ფოტო: თამუნა გეგიძე / On.ge

მანამდე კარვის გაშლას ცდილობდა ზაზა სარალიძე, რომელიც პოლიციასთან დაპირისპირების დროს ცუდად გახდა.

რამდენიმე დღის წინ შვილმოკლულმა მამამ, ზაზა სარალიძემ თბილისის მერიისგან წერილი მიიღო, სადაც აღნიშნული იყო, რომ თბილისში, პარლამენტის შენობის მიმდებარე ტერიტორია უნდა დაეტოვებინა. მიზეზი ახალი წლისთვის ნაძვის ხის დადგმა იყო.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

თბილისის მერიისგან ზაზა სარალიძისთვის მსგავსი შინაარსის კომუნიკაციის გამო არასამთავრობო ორგანიზაციებმა 10 ნოემბრისთვის აქცია "კარვებით ვიცავთ თავისუფლებას!" დააანონსეს.