“გამოცდების პერიოდში კომპიუტერებში ინტერნეტი იყო ჩართული და ზოგიერთი გამოსაცდელი საკანონმდებლო მაცნეს იყენებდა, რაც კანონმდებლობით დარღვევაა“, - თბილისის საქალაქო სასამართლოს ყოფილი თავჯდომარე მამუკა ახვლედიანი მოსამართლეთა საკვალიფიკაციო გამოცდების შედეგების გაყალბების ფაქტის დასადასტურებლად ახალ დეტალებზე საუბრობს. მისი განმარტებით, აღნიშნული დარღვევის გამო რამდენიმე ადამიანი გამოცდიდანაც კი მოხსნეს.

მამუკა ახვლედიანი იუსტიციის უმაღლესი საბჭოს ტესტების სკანდალზე ჩატარებულ შიდა მოკვლევას ეჭვქვეშ აყენებს. მისთვის გაუგებარია, თუ როგორ გაარკვია საგამოცდო კომისიის თავჯდომარე ლევან მურუსიძემ კონფიდენციალური ტესტების გამტანი პირები. ის არ გამორიცხვას, რომ საბჭოს მიერ სავარაუდო დანაშაულის შესწავლით მათ გარკვეული პირების ბრალეულობა დაფარეს. ის ასევე განმარტავს, რომ უკვე გაიარა არასამთავრობო ორგანიზაციებთან კონსულტაციები და მისი გადაყენების გასაჩივრებას უახლოეს დღეებში გეგმავს.

ახვლედიანის ინფორმაციით, კონკურსის მსვლელობისას მოსამართლეებს გარკვეულ პირებთან ჰქონდათ მიმოწერა. ის ასევე ეჭვობს, რომ ე.წ. ტესტების სკანდალში უშუალოდ საგამოცდო კომისიის თავჯდომარე-ლევან მურუსიძე და ნინო გვენეტაძე იყვნენ ჩართულები. რადგან ავტორებს სწორედ გვენეტაძესთან მიჰქონდათ საგამოცდო ტესტები და კაზუსები.

ახვლედიანის თქმით, იუსტიციის უმაღლესი საბჭოდან მოსამართლეების საკვალიფიკაციო გამოცდის ტესტმა წინასწარ გაჟონა. ინფორმაციას ამის შესახებ ის უკვე რამდენიმე კვირაა ავრცელებს. 22 თებერვალს იუსტიციის უმაღლესმა საბჭომ ახვლედიანი თბილისის საქალაქო სასამართლოს თავჯდომარის თანამდებობიდან გაათავისუფლა. ის მიიჩნევს, რომ აღნიშნული მისი განსხვავებული აზრის დევნის შედეგია.