განახლება: ერთი პოსტისა და რამდენიმე წუთის შემდეგ კვირიკაშვილი ფეისბუქზე აღარ იძებნება

საქართველოს ექს-პრემიერმა, გიორგი კვირიკაშვილმა მინისტრი პოსტის დატოვების შემდეგ გაუქმებული ფეისბუქგვერდი განაახლა. 2018 წლის 13 ივნისის გამოსამშვიდობებელი განცხადების შემდეგ პირველი პოსტი კვირიკაშვილმა დღეს, 7 ნოემბერს გამოაქვეყნა.

როგორც კვირიკაშვილი წერს, გადასარჩენია ის ფასეულობები, რომლისაც სწამდა. მისი თქმით, პოლიტიკურ აქტივობას არ აპირებს, მაგრამ სათქმელი ბევრი აქვს.

ფოტო: დათო აბზიანიძე

კვირიკაშვილი 2018 წლის 13 ივნისს გადადგა და ამის მიზეზად პარტიის ლიდერთან ეკონომიკურ საკითხებზე აზრთა სხვადასხვაობა დაასახელა. მისი ადგილი იმ დროს ფინანსთა მინისტრმა, მამუკა ბახტაძემ დაიკავა.

5 ივლისს კვირიკაშვილმა პარტია ქართული ოცნებაც დატოვა. ჟურნალისტებთან საუბრის დროს ოცნების გენერალურმა მდივანმა, კახა კალაძემ განაცხადა, რომ გიორგი კვირიკაშვილმა პარტია საკუთარი სურვილით განცხადების საფუძველზე დატოვა.

2018 წლის სექტემბერში კვირიკაშვილი EBRD-ის საერთაშორისო მრჩეველი გახდა.