შესწორება: ნიუსის გამოქვეყნებიდან რამდენიმე წუთში გიორგი კვირიკაშვილის ფეისბუქგვერდი ისევ აღგდგა.

ყოფილი პრემიერ-მინისტრი, გიორგი კვირიკაშვილი ფეისბუქზე დაბრუნებისა და ერთი პოსტის დაწერის შემდეგ სოციალურ ქსელში ისევ აღარ იძებნება.

როგორც მთავრობის პრესსამსახური On.ge-სთან ამბობს, კვირიკაშვილის გადადგომის შემდეგ მთავრობის ადმინისტრაცია მის გვერდს აღარ მართავს.

საქართველოს ექს-პრემიერმა, გიორგი კვირიკაშვილმა მინისტრი პოსტის დატოვების შემდეგ გაუქმებული ფეისბუქგვერდი რამდენიმე წუთით განაახლა. 2018 წლის 13 ივნისის გამოსამშვიდობებელი განცხადების შემდეგ პირველი პოსტი კვირიკაშვილმა დღეს, 7 ნოემბერს გამოაქვეყნა.

როგორც კვირიკაშვილი წერდა, რომ გადასარჩენი იყო ის ფასეულობები, რომლისაც სწამდა. მისი თქმით, პოლიტიკურ აქტივობას არ აპირებს, მაგრამ სათქმელი ბევრი აქვს:

"[მხარს ვუჭერ] ფასეულობებს, რომლებიც ძვირფასი იყო ყოველთვის, მათ შორის 2007 წლის შემოდგომაზე, 2011 წლის შემოდგომაზე, და რომელსაც ქართველი ხალხის უდიდესმა ნაწილმა დაუჭირა მხარი 2012-ში და შემდგომ 2016-ში... და ყველაფრის მიუხედავად და ყველაფრის გათვალისწინებითაც, ფასეულობები გადასარჩენია, გადასარჩენია ახლა, ამ მომენტში, და გადასარჩენია მუდმივად. და ეს დაუსრულებელი ძალისხმევა არ დაიღლება ჩვენს ერში, და არ დაიღლება ჩემშიც, სანამ სული მიდგას".

ქართული ოცნების დამფუძნებელმა და თავმჯდომარემ, ბიძინა ივანიშვილმა 5 ნოემბერს გავრცელებულ ვიდეომიმართვაში "ძველ გვარდიას", გაბრაზებულ თანამებრძოლებს მიმართა.

"ახლა მთავარია, ხელისუფლებასა და ცალკეულ ჩინოვნიკებზე გაბრაზებულებმა, ხელისუფლების დასჯის სურვილით, საკუთარი მომავალი და საკუთარი ქვეყანა არ დავსაჯოთ და არ გადავყაროთ წყალში ყველაფერი, რაშიც 2012-ში სიცოცხლე ჩავდეთ", — აღნიშნა ივანიშვილმა ვიდეომიმართვაში.

გიორგი კვირიკაშვილი 2018 წლის 13 ივნისს გადადგა და ამის მიზეზად პარტიის ლიდერთან ეკონომიკურ საკითხებზე აზრთა სხვადასხვაობა დაასახელა. მისი ადგილი იმ დროს ფინანსთა მინისტრმა, მამუკა ბახტაძემ დაიკავა.

5 ივლისს კვირიკაშვილმა პარტია ქართული ოცნებაც დატოვა. ჟურნალისტებთან საუბრის დროს ოცნების გენერალურმა მდივანმა, კახა კალაძემ განაცხადა, რომ გიორგი კვირიკაშვილმა პარტია საკუთარი სურვილით განცხადების საფუძველზე დატოვა.